14.09c
Երեվան
ուրբ, մյս 01
Հազարաւոր թունիսցիներ շաբաթ օր բողոքի ցոյց կատարած են երկրի մայրաքաղաքը՝ դատապարտելով նախագահ՝ Քայս Սայէտի կողմէ իշխանութիւն գրաւելը եւ պատասխանատուութիւն պահանջելով երկրի տնտեսական ձգձգուող ճգնաժամի համար, կը հաղորդէ AFP-ն:
Թունիսի կեդրոնը ցուցարարները վանկարկած են «Հեռացի՛ր», «Յեղափոխութիւն բռնապետ Քայսի դէմ» եւ «Յեղաշրջում չ'ըլլար»։
Երթը կազմակերպած է Ազգային փրկութեան ճակատը՝ ընդդիմադիր կուսակցութիւններու դաշինքը, ներառեալ Ennahdha-ն, որ կը գերակշռէր Թունիսի խորհրդարանին մէջ մինչեւ այն ցրուեցաւ Սայէտի կողմէ:
Թունիսի նախկին վարչապետ եւ Ennahdha-ի բարձրաստիճան պաշտօնեայ՝ Ալի Լաարաէտ AFP-ին ըսած է, որ բողոքի ցոյցը «զայրոյթի արտայայտութիւն էր Քայս Սայէտի օրօք տիրող իրավիճակի նկատմամբ»: «Մենք անոր կ'ըսենք, որ գնա՛»։
Սայէտի կողմէ իշխանութիւն գրաւելը ողջունած են որոշ թունիսցիներ, որոնք յոգնած են,ինչպէս իրենք կ'ըսեն, քմահաճ եւ փտտած համակարգէն, որ ստեղծուած է 2011-ին հանգուցեալ բռնապետ՝ Զէն ալ Ապիտին Ալիին տապալած յեղափոխութենէն յետոյ:
Սակայն վատթարացող տնտեսական իրավիճակը, որ խորացած է մատակարարումներու անբաւարարութենէն, ցնցած է 12 միլիոն բնակչութիւն ունեցող երկրի շատերը:
Եթէ Սայէտ մնայ, «Թունիս ապագայ չ'ունենար», ըսած է Լաարաէտ՝ վկայակոչելով աճող յուսահատութիւնը, աղքատութիւնը եւ գործազրկութիւնը:
Ազգային փրկութեան ճակատը յայտարարած է, որ պիտի պոյքոթի դեկտեմբերին կայանալիք քուէարկութիւնը՝ սահմանափակ լիազօրութիւններով նոր խորհրդարան ընտրելու համար:
Անոր ցուցարարներէն քանի մը հոգին տարած են դատարկ տարաներ, որոնք խորհրդանշած են ջուրի գնի աճը գնաճի պատճառով, որ սեպտեմբերին հասած էր 9,1 տոկոսի:
Սայէտ հրապարակային ելոյթներով յայտարարած է, որ կ'աշխատի «շտկել» այն տնտեսական խնդիրները, որոնք ժառանգած է Թունիսի ղեկավարութենէն Պըն Ալիի իշխանութենէն յետոյ:
Կանխիկ փողերու կարիք ունեցող Թունիս մօտ 2 միլիառ տոլարի վարկ տրամադրելու մասին բանակցութիւններ կը վարէ Արժոյթի միջազգային հիմնադրամին հետ։
