18.31c
Երեվան
երք, հնս 23
Ատրպէյճանի վերջին գործողութիւնները իր կողմէ ծրագրուած պատերազմի նախերգանքն են։ Այս մասին NEWS.am-ի հետ զրոյցին ըսած է ԼՂՀ ինքնապաշտպանական բանակի առաջին հրամանատար, ռազմական գործիչ Արկադի Կարապետեանը (Ագօ):
«Ատրպէյճանը չի փորձում լարուածութիւնը մեծացնել, Ատրպէյճանը կռուի է պատրաստւում։ Յստակ կատարում է իր ծրագիրը, պատերազմն անխուսափելի է։ Իրենց վերջնական խնդիրը Հայաստանը եւ հայ ազգը ոչնչացնել է։ Ատրպէյճանն ասում է՝ Երեւանն իմն է, իսկ մարդիկ իրենց հանգստացնում են, որ սադրանքներով Ատրպէյճանն ընդամէնը միջանցք է ուզում։ Մինչեւ այս ազգը չմիանայ, ուժ չդառնայ, չենք կարող մեր ծրագրերն իրագործել։ Մենք նոյնիսկ չգիտենք՝ ինչ ենք ուզում, քանի որ չունենք գաղափարախօսութիւն։ Այն, որ Հայաստանից այլեւս ժամկէտային զինծառայողներ չեն մեկնելու Արցախ, նշանակում է, որ Արցախը մնաց մենակ։ Հայաստանի Հանրապետութեան իշխանութիւնները ձեռքերը լուացին Արցախից։ Ամէն ինչ շատ պարզ է, ինչ էլ ասուի։ Մեր առաջին հանրապետութեան վերջին նիստը սկսուել է այսպէս՝ մենք կարող էինք տալ Ղարաբաղին զէնք, զինամթերք, բայց չտուեցինք։ Հիմա էլ շատ բան չի փոխուել, ամէն ինչ կրկնւում է»,- նշած է Կարապետեանը։
Արկադի Կարապետեանի դիտարկմամբ՝ մեր Զինուած ուժերն այսօր լաւ վիճակի մէջ չեն, սակայն խնդիրը հնարաւոր է կարգաւորել օրերու ընթացքին։
«Բանակն այնպիսի վիճակի է պէտք բերել, որ հնարաւոր լինի բոլորի վրայով անցնել։ Ես կարծում եմ՝ ամենածանրը մեզ համար բանակի բարոյահոգեբանական վիճակն է։ Հիմա մենք ողնաշար չունենք։ Բանակում պէտք է ծառայել այնպէս, ինչպէս ծառայում են եկեղեցուն։ Պէտք չէ աշխատել բանակի համար, պէտք է ծառայել, որովհետեւ ծառայելուց ուրախութիւն ես ստանում, արդիւնաւէտութիւնն էլ հազարապատկւում է»,- նկատած է Արկադի Կարապետեանը։
Ըստ Արկադի Կարապետեանի՝ հիմա հնարաւոր չէ պատկերացնել, թէ ինչ կրնայ ըլլալ այն ժամանակ, երբ ռուս խաղաղապահները դուրս գան Արցախէն, քանի որ աշխարհի մէջ իրավիճակը դասաւորուած է այնպէս, որ նոյնիսկ հնարաւոր չէ կանխատեսել, թէ ինչ կը պատահի կէս ժամ անց։
«Պէտք է խօսենք, թէ վաղն ի՞նչ է լինելու։ Ես լաւատես եմ, որովհետեւ մեր ազգը Սարդարապատի զգացումն ունի։ Մեզ մօտ շատ հարցեր են լուծւում։ Մեզ է թւում, թէ մենք կարեւոր չենք աշխարհի համար, դրա համար էլ այս վիճակում ենք։ Իսկ իրականում՝ շատ կարեւոր ենք։ Մենք միշտ էլ ինչի որ հասել ենք, հասել ենք միայնակ։ Աստուած մեզ ամէն ինչ ցոյց է տալիս, ընդամէնը տեսնել է պէտք։ Մեր ծրագիրը պէտք է փոխուի, ակնյայտ է, որ մեր պոտենցիալն ու կարողութիւնները շատ մեծ են»,- ընդգծած է Արկադի Կարապետեանը։
Անդրադառնալով «Քաղաքացիական պայմանագիր» խմբակցութեան պատգամաւոր Արսէն Թորոսեանի այն յայտարարութեան, թէ տասնամեակներ շարունակ մեզի քարոզուած է մահ, Կարապետեանը նշած է, որ խաղաղութիւնը եւս պաշտպանութեան կարիք ունի։
«Ով այդպէս է ասում, թող Ամերիկայում հանգիստ, չաղ ու բախտաւոր ապրի: Ո՞վ է մահ քարոզել, նման բան չկայ։ Եթէ նման բան լինէր, մենք ուղղակի չէինք լինի։ Աշխարհը խաղաղութիւն չի ուզում, ազգեր կան, որոնք բաց տեքստով ասում են՝ Հայաստանը պէտք է կոտորուի, օրինակ՝ Փաքիստանի Հանրապետութիւնը։ Դէ եկէք Փաքիստանին ասենք՝ մենք ձեր եղբայրն ենք։ Կ'ընդունի՞ մեզ։ Ծիծաղելի է, եթէ այս վիճակում ասենք՝ պատերազմ ենք ուզում, բայց պէտք է պատրաստ լինես խաղաղութիւնդ, քեզ պաշտպանելու։ Մահն էլ այստեղ մեղաւորութիւն չունի։ Եթէ չես կարողանում քեզ պաշտպանել, պէտք է մահանաս։ Խաղաղութեան դարաշրջանի մասին անդադար խօսելը, պատրաստուելը թոյլի անգործութեան արդարացումն է։ Կեանքը շատ պարզ է ու դաժան։ Ոչ մի բան աշխարհում ու մարդակային յարաբերութիւններում չի փոխուել։ Տագնապի մէջ որեւէ օրկանիզմ չի կարող երկար գոյատեւել»,- աւելցուցած է Կարապետեանը։
