13.09c
Երեվան
հնգ, փտր 26
Իրանի խորհրդարանի Ազգային ապահովութեան եւ արտաքին քաղաքականութեան յանձնախումբի ղեկավար Վահիտ Ճալալզատէ յայտարարեց, թէ Իրան «տարածաշրջանի սահմանները փոխելու երազանքը մղձաւանջի պիտի վերածէ», կը հաղորդէ «Փարսթուտէյ» կայքը:
Ճալալզատէ պատկերասփիւռային զրոյցի մը ընթացքին մտահոգութիւն յայտնելով Ատրպէյճանի եւ Հայաստանի սահմաններուն վրայ տեղի ունեցած վերջին իրադարձութիւններուն վերաբերեալ՝ ըսաւ. «Իսլամական խորհրդարանի Ազգային ապահովութեան յանձնախումբը կ՛ուսումնասիրէ վերջին զարգացումները»:
Ան յայտարարեց, որ Թեհրան Ատրպէյճանի, Հայաստանի, Թիւրքմենիստանի եւ խորհրդային այլ հանրապետութիւններու կողքին եղած է՝ անոնց անկախութեան առաջին իսկ օրերէն եւ տարբեր տեսակի օգնութիւններ ցուցաբերած է այդ երկիրներու կառավարութիւններուն: «Իրան պիտի կանխարգիլէ տարածաշրջանի սահմաններու փոփոխութիւնը» աւելցուց Ճալալզատէ:
Իրանի բարձրաստիճան պաշտօնատարները նախապէս եւս զգուշացուցած են շրջանի սահմաններու փոփոխութեան հետեւանքներէն եւ Իրանի կարծր արձագանգէն` նշելով, որ այդ Թեհրանի կարմիր գիծն է:
