21.09c
Երեվան
շբթ, մյս 24
Ֆրանսայի նախագահ Էմանուէլ Մաքրոն, մայիս 7-ին Փարիզի մէջ ընդունելով Սուրիոյ անցումային շրջանի նախագահ Ահմետ Շարըհը, կոչ ըրած է անոր ամէն բան ընելու առանց բացառութեան բոլոր սուրիացիներու պաշտպանութիւնն ապահովելու համար:
«Արմէնփրէս»-ի հաղորդմամբ՝ այս մասին հաղորդած է BFMTV հեռուստաալիքը։
Մամուլի ասուլիսին Մաքրոն յայտարարած է, որ այդ պաշտպանութիւնը պէտք է տրամադրուի սուրիացիներուն՝ «անկախ անոնց ծագումէն, կրօնէն, դաւանանքէն, հայեացքներէն»։
Ֆրանսայի նախագահը կոչ ըրած է Սուրիոյ ղեկավարին ապահովելու, որ տրուզներու դէմ վերջերս տեղի ունեցած միջդաւանական բռնութեան եւ ալաուի փոքրամասնութեան անդամներու նկատմամբ մարտին տեղի ունեցած հաշուեյարդարի համար մեղաւորները «պատասխանատւութեան ենթարկուին եւ դատապարտուին»։
Մաքրոն նաեւ յայտարարած է այդ յանցագործութիւններու մէջ մեղաւորներու դէմ Եւրոմիութեան կողմէ պատժամիջոցներ սահմանելու անհրաժեշտութեան մասին։
Ատոր հետ մէկտեղ Ֆրանսայի նախագահը հանդէս եկած է Սուրիոյ դէմ սահմանուած «եւրոպական տնտեսական պատժամիջոցներու աստիճանական վերացումը» շարունակելու օգտին, եթէ գործող իշխանութիւնը կայունացնէ երկրի մէջ իրադրութիւնը։
