30.09c
Երեվան
հնգ, հնս 26
Խաժակ Արքեպիսկոպոս Պարսամեան
Սրտի խոր ցաւով իմացանք Խմբավար Խորէն Մէյխանեճեանի մահուան գոյժը, ու սոյն տողերը կը գրեմ մեր կորուստի ցաւը յայտնելու։
Մայէստրոյ Խորէնի մահը անփոխարինելի դատարկութիւն պիտի ձգէ ոչ միայն ԱՄՆ-ի Արեւելեան թեմին, այլեւ ողջ Հայ Եկեղեցւոյ մէջ:
Սրբազան երաժշտութեան միջոցով Աստուծոյ փառաբանելուն անոր անսահման նուիրուածութիւնը կը վկայէր աստուածային կոչման մասին, զոր ան ընդունած էր իր ողջ կեանքի ընթացքին, ինչպէս նշուած է Մատթէոս Աւետարանի 25:14-30-ի մէջ, ուր տաղանդներու առակը մեզի կը յիշեցնէ, որ մեզմէ իւրաքանչիւրին վստահուած են Աստուծոյ պարգեւները, որոնք նախատեսուած են Անոր փառաբանելու:
Դաստիարակուելով Սուրբ Էջմիածինի Մայր Աթոռի սրբազան միջավայրին մէջ՝ մայէստրոյ Խորէնը կը մարմնաւորէր հաւատքի եւ նուիրուածութեան էութիւնը: Ան կը հասկնար, ինչպէս կ ՚ըսուի Պետրոս Առաքեալի Ընդհանրական Ա. Թուղթի 4։10-ի մէջ, որ «ձեզմէ իւրաքանչիւրը իբրեւ Աստուծոյ բազմատեսակ պարգեւներուն իրաւ տնտես՝ իր ստացած շնորհքը ուրիշներուն թող մատակարարէ»: Իր ակնառու ասպարէզի ընթացքին մայէստրոյ Խորէնը մարմնաւորած է այս սկզբունքը՝ օգտագործելով Աստուծոյ տուած տաղանդները՝ մեր համայնքի հոգեւոր կեանքը բարելաւելու համար։
ԱՄՆ-ի Արեւելեան թեմէն ներս մեր Առաջնորդութեան սկզբնական տարիներուն, Ամենայն հայոց կաթողիկոս երջանկայիշատակ Վազգեն Ա․-ի օրհնութեամբ, մենք պատիւ ունեցանք մայէստրոյ Խորէնը հրաւիրելու Արեւելեան թեմ՝ ծառայելու որպէս Սուրբ Վարդան տաճարի երգչախումբի խմբավար: Անոր նշանակումը, որպէս Առաջնորդարանի հոգեւոր երաժշտութեան բաժինի տնօրէն, հնարաւորութիւն ընձեռեց թեմի ծխական համայնքներու երիտասարդ եւ փորձառու անդամներու մէջ խոր արթնութիւն եւ արժեւորում սրբազան երաժշտութեան նկատմամբ: Նուիրուածութեամբ եւ մեծ սիրով ան մարզած է ծխական երգչախումբեր, դաստիարակած խորանի սպասաւորներ եւ սերունդէ սերունդ գիտելիքներ փոխանցած՝ ծաղկող հաւատքի սերմեր ցանելով ճեմարանականներուն մէջ:
Մայէստրոյ Խորէնը իւրայատուկ սէր ունէր երեխաներու հետ շփուելու․ թեմական ամառնային ճամբարներու անոր աշխատանքը ցոյց կու տար իր անձնուիրութիւնը հաւատացեալներու յաջորդ սերունդը դաստիարակելու: Խորէնի՝ շրջապատի մարդոց ոգեշնչելու եւ ոգեւորելու ունակութիւնը ամփոփուած է Պօղոս Առաքեալի Կողոսացիներուն ուղղած 3։23-24-ի խօսքերուն մէջ. «Ինչ որ ալ ընէք՝ սրտանց ըրէք, այնպէս ինչպէս պիտի ընէիք Տիրոջ, եւ ոչ՝ մարդոց։ Գիտցէք, որ Տիրոջմէ է որ պիտի առնէք ձեր հատուցումը, որ խոստացաւ ձեզի տալ, քանի որ Տիրոջ՝ այսինքն Քրիստոսին է որ կը ծառայէք»: Ակնյայտ է, որ մայէստրոյ Խորէնը Եկեղեցւոյ կեանքին մէջ իր ներդրումը կը համարէր սրբազան ծառայութիւն՝ նուիրուած Աստուծոյ սէրը մարմնաւորելուն։
Ես կը ցանկայի օգտագործել այս պահը՝ յիշելու այն ուրախութիւնը, որ մենք վայելեցինք մայէստրոյ Խորէնի 60-ամեակի տօնակատարութեան ժամանակ, ուր ինծի համար պատիւ էր անոր յանձնել Մայր Աթոռ Սուրբ Էջմիածնի Սուրբ Սահակ եւ Սուրբ Մեսրոպ պատուոյ շքանշանն ու Ամենայն հայոց կաթողիկոս Գարեգին Ա․-ի կոնդակը: Այդ արժանի յարգանքի տուրք էր այն մարդուն, որ իր կեանքը նուիրած էր Տիրոջը ծառայելուն․ ան կը մնայ մեր բոլորին համար թանկ յիշողութիւն:
Սիրելի Խորէնի մահը մեծ կորուստ է մեր համայնքին համար։ Իմ խորին ցաւակցութիւններս կը յայտնեմ անոր սիրելի տիկնոջ եւ կեանքի զուգընկերոջ՝ Ֆլորային, զաւակներուն՝ Յակոբին, Յասմիկին եւ Յասմիկի ամուսինին՝ Մանուէլին, ինչպէս նաեւ անոր թանկագին թոռներուն։
Վստահ ենք, որ այժմ երկինքի արքայութեան մէջ հանգուցեալ մայէստրոյ Խորէնը Տիրոջմէ պիտի ստանայ իր հատուցումը, քանի որ հանգուցեալը իր ամբողջ կեանքի տեւողութեան ընթացքին Հայ Եկեղեցւոյ սրբազան աւանդութիւններու ճանապարհով ծառայեց Տիրոջը (Կողոսացիներ 3:23-24):
Թող յաւէրժ մնայ անոր յիշատակը։
