-3.91c
Երեվան
երկ, դկտ 22
Հալէպի հիւանդանոցներուն մէջ վերջերս պատահած հրդեհները մտահոգիչ դարձած են: Վերջինը «Ալ Անտալոս» սեփական հիւանդանոցի մէջ բռնկած հրդեհն էր, որ լայնօրէն տարածում գտաւ լրատուամիջոցներով եւ ընկերային հարթակներով:
Այս մասին «Արեւելք» կը տեղեկանայ UEPA կայքէն:
Ի պատասխան այս լուրերուն, Սեփական հիւանդանոցներու միութեան խորհուրդը հաղորդագրութիւն տարածած է, ուր մասնաւորապէս կ'ըսէ,-
«Ելեկտրական հոսանքի լարերուն պատճառաւ, մասնաւորապէս հիւանդանոցի առաջին յարկի փակ սենեակներէն մէկուն մէջ, 22 Փետրուարի առաւօտեան ժամը 4:00-ին հրդեհ յառաջացաւ: Հիւանդանոցի աշխատակիցները փորձեցին մարել կրակը, նաեւ ահազանգեցին հրշէջներուն, որոնք անմիջապէս հասան ու մարեցին հրդեհը: Մինչ այդ հիւանդները՝ թիւով 10 փոխադրուեցան շտապ օգնութեան ինքնաշարժներով մօտիկ այլ հիւանդանոցներ»:
Իսկ ինչ կը վերաբերի երեք մահացողներուն՝ երկու կնոջ եւ տղամարդուն, հաղորդագրութեան մէջ նշուած է, որ անոնք արդէն յառաջացած հիւանդութեան հանգրուանին հասած տարեցներ էին, եւ հրդեհը պատճառ չէր անոնց մահուան:
Սեփական հիւանդանոցներու խորհուրդը նաեւ անդրադարձած է այդ երեք հիւանդներուն հիւանդութեանց նշելով թէ առաջինը քաղցկեղէ կը տառապէր, երկրորդը՝ մարսողական ուղիներու արիւնահոսութենէ, իսկ երրորդը՝ ուղեղային կաթուածէ եւ այլ ուղեկցող հիւանդութիւններէ:
«Սեփական Հիւանդանոցներու միութեան խորհուրդը կը ցաւի, թէ ինչպէս կարգ մը պատկան մարմիններ ու լրատուական միջոցներ արձագանգեցին այս հրդեհին տարածելով կեղծ լուրեր ածխացած դիակներու մասին, առանց ստուգելու լուրերու ճշգրտութիւնը»,- եզրափակուած է հաղորդագրութիւնը:
