Պարէնի համաշխարհային գիները կ'աճին ամենաարագ կշռոյթներով, քանի որ Ուքրանիոյ մէջ պատերազմը կ'անդրադառնայ գիւղատնտեսական մշակաբոյսերու պաշարներուն վրայ` սպառողներուն հասցնելով աւելի շատ սղաճի տառապանքներ եւ խորացնելով համաշխարհային սովի ճգնաժամը:
Պատերազմը վնաս հասցցուցած է կարեւորագոյն սեւծովեան տարածաշրջանին մէջ մատակարարումներու շղթաներուն` խախտելով համաշխարհային առեւտուրի հոսքերը եւ խուճապ յառաջացնելով` կապուած հիմնական սննդամթերքի պակասի հետ: Սա յանգեցուցած է պարէնային ապրանքներու մրցանշային բարձր գիներու, որոնք արդէն իսկ բարձրացած էին մինչ հակամարտութիւնը, իսկ անցած ամիս ՄԱԿ-ի համաշխարհային ծախսերու ցուցակը աճած է եւս 13 տոկոսով:
Ուքրանիոյ նաւահանգիստները փակ են, եւ շատ նաւեր կը խուսափին տարածաշրջանէն, որուն բաժին կ'իյնայ հացահատիկի առեւտուրին մօտ մէկ քառորդը: Կ'ակնկալուի, որ Ուքրանիոյ մէջ գիւղատնտըսները կտրուկ կրճատեն ցանքատարածութիւնները: Երկիրը ամբողջ ուժով կը փորձէ արտահանել արդէն հաւաքած բերքը: Աշխարհի այլ երկիրներու մէջ ուժանիւթակիրներու եւ պարարտանիւթերու բարձր գիները կը բարձրացնեն սննդամթերքի արտադրութեան ծախսերը:
Պարէնային ապրանքներու գիներու աճը մեծապէս կը զգացուի աղքատ երկիրներու մէջ, ուր սննդամթերքը կը կազմէ սպառողական պիւտճէին մեծ մասը, իսկ ուքրանական ճգնաժամին ազդեցութիւնը յանգեցուցած է հիմնական սննդամթերքի, օրինակ` հացի գիներու կտրուկ աճի:
ՄԱԿ-ի Պարէնի եւ գիւղատնտեսութեան կազմակերպութեան համաշխարհային գիներու ցուցակը 2020-ի կէսերէն բարձրացած է աւելի քան 50 տոկոսով` գերազանցելով 2008 եւ 2011 թուականներու մակարդակները, որոնք նպաստած են պարէնային համաշխարհային ճգնաժամներուն: ՄԱԿ-ը զգուշացուցած է, որ գիները կրնան աւելի բարձրանալ: