6.09c
Երեվան
հնգ, դկտ 26
Գանատան յայտարարած է, որ կտրուկ պիտի կրճատէ թիւը այն ներգաղթեալներու, որոնց թոյլ պիտի տրուի, որ մշտապէս բնակութիւն հաստատեն երկրին մէջ. նպատակը «բնակչութեան աճը դադրեցնելու» փորձն է, գրած է BBC՝ նկատել տալով, որ այս մէկը վարչապետ Ճասթըն Թրիւտոյի կառավարութեան քաղաքականութեան մէջ էական փոփոխութիւն է:
Լիպերալ (ազատական) կառավարութիւնը պարտաւորուած էր առաջիկայ երկու տարուան ընթացքին տարեկան կէս միլիոն օտարերկրացիներու մշտական բնակութիւն տրամադրել, սակայն Թրիւտօ այժմ յայտարարած է, որ թիրախը վերանայուած է եւ փոփոխութեան ծիրէն ներս Գանատան 2025 թուականին պիտի նուազեցնէ մշտական բնակիչներու թիւը՝ նախկին 500,000-էն մինչեւ 395,000-ի, ինչ որ կը նշանակէ 21%-ով անկում: Անկէ յետոյ այդ թիւը պիտի նուազի մինչեւ տարեկան 380,000-ի, իսկ 2027 թուականին՝ մինչեւ 365,000-ի:
Վարչապետ Թրիւտօ ընդգծած է, որ իր կառավարութիւնը «հաւասարակշռութիւնը ճիշդ չէ հաշուարկած», երբ յետհամավարակային ժամանակաշրջանին ուժեղացուցած է ներգաղթի հոսքը՝ երկրին մէջ աշխատուժի պակասը լրացնելու համար:
2015-ին Թրիւտոյի ընտրուելէն ի վեր, անոր կառավարութիւնն ամէն տարի մշտական բնակութեան իրաւունք ստացող ներգաղթեալներու թիւը 272,000-էն բարձրացուցած է 485,000-ի: Ամենամեծ թռիչքը գրանցուած էր 2021 թուականին՝ Քովիտ-19 համավարակէն յետոյ։
