6.09c
Երեվան
հնգ, մրտ 13
Գաբրիէլ Չէնպէրճեանի պաշտպանական խումբը հանդէս եկած է յայտարարութեամբ, որուն մէջ ըսուած է․
«2018 թուականի մայիսի 2-ին յարուցուած քրէական գործը վեց ու կէս տարի շարունակուել է առանց էական առաջընթացի: Այս ողջ ժամանակահատուածում Գաբրիէլ Չէնպէրճեանը, հանդէս գալով որպէս վկայ, ցուցաբերել է բացառիկ համագործակցութիւն՝ երկու անգամ՝ 2018 թուականի յուլիսի 25-ին եւ 2023 թուականի հոկտեմբերի 10-ին, սեփական նախաձեռնութեամբ եւ առանց փաստաբանի ներկայանալով հարցաքննութեան եւ տրամադրելով սպառիչ ցուցմունքներ: Նշուած ժամանակահատուածում նրա մասնակցութեամբ որեւէ այլ քննչական գործողութիւն չի իրականացուել, եւ նոր ապացոյցներ ձեռք չեն բերուել:
Յատկանշական է, որ վերջին մէկ-երկու տարուայ ընթացքում քրէական վարոյթի նախաքննութեամբ որեւէ նոր փաստական տուեալ կամ ապացոյց ձեռք չբերելով՝ 2024 թուականի դեկտեմբերի 4-ին հսկող դատախազը, հիմնուելով բացառապէս գործում առկայ վաղեմի տուեալների վրայ, կայացրեց Գաբրիէլ Չէնպէրճեանի նկատմամբ քրէական հետապնդում յարուցելու որոշում՝ ՀՀ նախկին քրէական օրէնսգրքի 38-190-րդ յօդուածի 3-րդ մասի 1-ին կէտով: Ըստ մեղադրանքի՝ նա իբր միջոցներ տրամադրելու եւ խոչընդոտներ վերացնելու եղանակով օժանդակել է յանցաւոր ճանապարհով ձեռք բերուած առանձնապէս խոշոր չափերով գումարի օրինականացմանը:
Ուշագրաւ է որոշման ընթացքը. այն վարոյթն իրականացնող մարմին է ուղարկուել յաջորդ օրը՝ առաւօտեան ժամը 06:55-ին, իսկ արդէն 07:10-ին ՀՀ հակակոռուպցիոն կոմիտէի քննիչը որոշում է կայացրել ձերբակալել Գաբրիէլ Չէնպէրճեանին: Այս շտապողական գործողութիւնների անհիմն բնոյթը հաստատուել է դեկտեմբերի 6-ին, երբ ՀՀ հակակոռուպցիոն դատարանը, ուսումնասիրելով գործի հանգամանքները, մերժել է քննիչի՝ կալանքը որպէս խափանման միջոց կիրառելու մասին միջնորդութիւնը՝ անյապաղ ազատ արձակելով Գաբրիէլ Չէնպէրճեանին: Սա էական իրաւական գնահատական է տուեալ գործընթացի օրինականութեանը:
2024 թուականի դեկտեմբերի 13-ին ՀՀ դատախազութիւնը յատուկ վերանայման բողոք է ներկայացրել ՀՀ վերաքննիչ հակակոռուպցիոն դատարան: Այս կապակցութեամբ մենք՝ որպէս Գաբրիէլ Չէնպէրճեանի պաշտպանական խումբ, անհրաժեշտ ենք համարում ներկայացնել մեր հիմնաւորուած դիրքորոշումը հետեւեալ հանգամանքների վերաբերեալ:
Գտնում ենք, որ ներկայացուած մեղադրանքն իրաւաբանօրէն անհիմն է եւ հակասում է ինչպէս գործում առկայ փաստական հանգամանքներին, այնպէս էլ առողջ տրամաբանութեանը: Մեր այս դիրքորոշումը հիմնաւորւում է հետեւեալ անվիճելի փաստերով:
Առաջին՝ մեղադրանքի հիմքում ընկած է իրաւական պարադոքս. Գաբրիէլ Չէնպէրճեանին մեղադրում են սեփական, օրինական ճանապարհով ձեռք բերուած միջոցների օրինականացմանն օժանդակելու մէջ: Սա ոչ միայն տրամաբանական, այլեւ իրաւական առումով անհեթեթ է: Միջոցները, որոնց մասին խօսւում է գործում, ձեւաւորուել են Սիրիայի Արաբական Հանրապետութիւնում եւ Ֆրանսայում իրականացուած օրինական ձեռնարկատիրական գործունէութեան արդիւնքում եւ Հայաստան են փոխանցուել բացառապէս բանկային համակարգի միջոցով:
Երկրորդ՝ վեց ու կէս տարուայ քննութիւնը չի բացայայտել որեւէ ապացոյց, որը կը վկայէր միջոցների ապօրինի ծագման մասին: Ընդհակառակը, գործում առկայ բոլոր փաստաթղթերը, ներառեալ բանկային փոխանցումների ողջ փաթեթը, հաստատում են դրանց օրինական բնոյթը: Սա էական հանգամանք է, որը լիովին անտեսուել է մեղադրանքի կողմից:
Երրորդ՝ վեց ու կէս տարուայ քննութեան ընթացքում Գաբրիէլ Չէնպէրճեանը ցուցաբերել է բացառիկ համագործակցութիւն քննութեան հետ. նա ոչ միայն չի թաքնուել եւ չի փորձել խուսափել քննութիւնից, այլեւ առանց փաստաբանի ներկայանալով՝ տուել է սպառիչ ցուցմունքներ: Նման վարքագիծը լիովին հակասում է ներկայացուած մեղադրանքին եւ կալանաւորման անհրաժեշտութեան մասին ՀՀ դատախազութեան եւ հակակոռուպցիոն կոմիտէի պնդումներին:
Չորրորդ՝ Գաբրիէլ Չէնպէրճեանի գործունէութիւնն ու ներդրումները Հայաստանում եղել են բացառապէս թափանցիկ եւ հաշուետու: Նշանակալի է, որ նա Հայաստանում եւ Արցախում երբեւէ չի զբաղուել պետական միջոցներից ֆինանսաւորուող ձեռնարկատիրական գործունէութեամբ, այլ հանդէս է եկել միայն որպէս ներդրող եւ բարերար: 2008 թուականից գործող «Փիւնիկ» բարեգործական հիմնադրամի միջոցով իրականացուել են աւելի քան յիսուն միլիոն ԱՄՆ տոլարի ծրագրեր, որոնց հիմնական նուիրատուն եղել է անձամբ Գաբրիէլ Չէնպէրճեանը:
Հինգերորդ՝ ուշագրաւ է, որ մեղադրանքի հիմքում ընկած է ընդամէնը այլ անձի լիազօրագիր տալու հանգամանքը, որը պայմանաւորուած է եղել սեփական բանկային հաշուից օգտուելու գործնական անհրաժեշտութեամբ: Նման գործողութիւնը ոչ մի կերպ չի կարող դիտարկուել որպէս յանցաւոր արարք:
Վեցերորդ՝ Գաբրիէլ Չէնպէրճեանն առ այսօր շարունակում է իր նշանակալի աջակցութիւնը ցուցաբերել թէ՛ պետութեանը եւ թէ՛ եկեղեցուն՝ հաւատարիմ մնալով իր հայրենանուէր գործունէութեան սկզբունքներին: Նման երկարամեայ եւ հետեւողական գործունէութիւնը վկայում է նրա՝ հանրային շահին ծառայելու անխախտ նուիրուածութեան մասին:
Ներկայացուած փաստերը վկայում են, որ Գաբրիէլ Չէնպէրճեանի դէմ յարուցուած քրէական հետապնդումը զուրկ է իրաւական եւ փաստական հիմքերից: Անհիմն մեղադրանքը վտանգում է ոչ միայն միջազգային հեղինակութիւն վայելող գործարարի եւ բարերարի հեղինակութիւնը, այլեւ Հայաստանի ներդրումային միջավայրի նկատմամբ վստահութիւնը:
Հաշուի առնելով գործի հասարակական հնչեղութիւնը, կարեւորում ենք ՀՀ վերաքննիչ հակակոռուպցիոն դատարանի կողմից բանաւոր ընթացակարգով բողոքի քննութեան անցկացումը, որը կ՚ապահովի գործի քննութեան թափանցիկութիւնն ու հանրութեան վստահութիւնը հակակոռուպցիոն դատական համակարգի նկատմամբ: Վստահ ենք, որ ՀՀ վերաքննիչ հակակոռուպցիոն դատարանի անաչառ քննութիւնը կը հաստատի ՀՀ հակակոռուպցիոն դատարանի կալանաւորման միջնորդութեան մերժման որոշման օրինականութիւնը՝ դրանով իսկ վերահաստատելով օրէնքի գերակայութիւնը:
Միքայէլ Համբարձումեան
Աշոտ Սիմոնեան
30․12․2024թ.»։
