36.82c
Երեվան
երք, հլս 28
«Քաղաքացիական պայմանագիր» խմբակցութեան ղեկավար Հայկ Կոնջորեանի եղբայրը՝ Աւետ Կոնջորեանը ծեծի ենթարկելու դէպքի առթիւ նախաձեռնուած քրէական վարոյթի շրջածիրէն ներս 5 անձի նկատմամբ յարուցուած է հանրային քրէական հետապնդում՝ Քրէական օրէնսգիրքի 195-րդ յօդուածի 2-րդ մասի 5-րդ կէտով (ֆիզիքական ներգործութիւնը, որ կատարուած է խումբ մը անձանց կողմէ):
Այս մասին տեղեկացուցած է Քննչական կոմիտէի մամուլի քարտուղար Կիմա Աւդալեանը։
Անոնցմէ 2-ի նկատմամբ որպէս խափանման միջոց կիրառուած է բացակայելու արգելքը եւ գրաւը:
Աւելի վաղ լրատուամիջոցները յայտնած էին, որ միջադէպը տեղի ունեցած է Աբովեան քաղաքին մէջ՝ Աւետ Կոնջորեանի բնակութեան շէնքի շքամուտքի մօտ։ Համացանցի մէջ տարածուած է նաեւ միջադէպը պատկերող տեսանիւթ։
ՆԳ նախարարի մամուլի քարտուղար Նարեկ Սարգսեանը լրատուամիջոցներուն յայտնած էր, որ յուլիս 25-ին ժամը 14։00-ին, ոստիկանութիւնը հաղորդում ստացած է մարմնական վնասուածք ստացած քաղաքացիի վերաբերեալ։
Քննչական կոմիտէէն ալ յայտնած էին, որ դէպքի առթիւ Կոտայքի մարզային քննչական վարչութենէն ներս նախաձեռնուած է քրէական վարոյթ՝ խումբ մը անձանց կողմէ ֆիզիքական ներգործութեան եւ խուլիգանութեան յատկանիշներով։ Երկու անձ ձերբակալուած էր։
