10.09c
Երեվան
շբթ, մրտ 14
Օրերս արաբական լրատուամիջոցները հաղորդած են, որ եգիպտացի նշանաւոր կատակերգակ Ատէլ Իմամ հանգստեան կոչուելով պիտի հեռանայ դերասանական իր ասպարէզէն։
Այս մասին «Արեւելք» կը տեղականայ «Ալ Արապիէ» կայքէն: Նոյն առումով լուրը հաստատած է անոր որդին, բեմադրիչ՝Ռամի Իմամ մշակութային միջոցառման մը ընթացքին: Իմամի որդին նաեւ ըսած է, որ իր հայրը որոշած է ընտանիքին հետ անցնել իր ժամանակը յայտնելով նաեւ, որ վերջինիս առողջական վիճակը կայուն է։
Ի դէպ, անցեալ մայիսին, Ատէլ Իմամի խորհրդատու եւ աշխատանքի համակարգող ՝ Ատէլ Սուլէյման հրապարակած էր աստղին 83-րդ տարեդարձի տօնակատարութեան լուսանկարներէն: Իմամ ծնունդը նշած էր իր բնակարանին մէջ ընտանիքի անդամներու եւ մտերիմներու ներկայութեամբ։
Յիշեցնենք, որ Ատէլ Իմամի վերջին գործը՝ «Վալենթինօ» տեսաշարն է, ներկայացուած 4 տարի առաջ, որմէ ետք ան «անհետացաւ» գեղարուեստի դաշտէն: Անոր բացակայութեան պատճառաւ ենթադրութիւններ տարածուած են, որ կը տառապի առողջական խնդիրներէ, բայց այդ բոլորը մնացին բամբասանքի շրջանակին մէջ։
Նշենք, որ Ատէլ Իմամ ծնած է 17 մայիս, 1940-ին: Ան կը համարուի Եգիպտոսի եւ արաբական աշխարհի ամէնէն ժողովրդականութիւն վայելող ու նաեւ սիրուած դերասաններէն մին: Ան յայտնի է իր կատակերգական գործերով, որոնք շաղախուած են քաղաքական, ընկերային եւ նոյնիսկ ողբերգական թեմաներով:
Ատէլ Իմամ, կամ ինչպէս զինք կ'անուանեն «Ալ Զայիմ», իր ասպարէզը սկսած է 60-ական թուականներու սկիզբը, եւ ունեցած բեղուն գործունէութիւն։
Անոր յաջողութիւններու արխիւին մաս կը կազմեն՝ 126 շարժանկար, 16 տեսաշար, 11 թատրոն եւ 1 ռատիո հաղորդում։
