10.09c
Երեվան
ուրբ, նմբ 14
Պաշտպանութեան բանակի նախկին հրամանատար, զօրավար հազարապետ Միքայէլ Արզումանեանի խափանման միջոց կալանքը փոխարինուեցաւ տնային կալանքով։
Որոշումը կայացուցած է ՀՀ հակափտածութեան դատարանի դատաւոր Վարդգէս Սարգսեանը, գրած է պաշտպան Երեմ Սարգսեանը։
Միքայէլ Արզումանեանը կալանաւորուած էր արդէն 3 տարի։
44-օրեայ պատերազմի օրերուն Արցախի պաշտպանութեան բանակը ղեկավարած Միքայէլ Արզումանեանին մեղադրանք առաջադրուած է Շուշիի եւ յարակից շրջաններու պաշտպանութեան կազմակերպման ընթացքին զինուորական պաշտօնէական անփութութեան համար։
Նախկին բարձրաստիճան զինուորականը, ըստ Քննչական կոմիտէի, պատերազմի վերջին տասը օրերուն՝ Շուշիի պաշտպանութեան ընթացքին, անփոյթ վերաբերմունք դրսեւորած է իր ծառայողական պարտականութիւններուն նկատմամբ, որուն հետեւանքով հակառակորդի զինուած ուժերը ամբողջութեամբ իրենց վերահսկողութեան տակ վերցուցած են քաղաքն ու մատոյցները, հայկական կողմը ունեցած է զոհեր եւ վիրաւորներ։
Ըստ հաղորդագրութեան՝ Արզումանեանը չէ յանձնարարած զօրք տեղակայել Շուշիի պաշտպանական բնագիծի չպահուող հատուածին այն պարագային, երբ իր ենթակայութեան տակ ունեցած է համապատասխան ներուժը, որոնց մէջ՝ 650 զինծառայողներէ բաղկացած կանոնաւոր բանակի ստորաբաժանումներ։
Իրաւապահներու պնդմամբ, մինչեւ 2020-ի 6 Նոյեմբերը Արզումանեանի ստորագրութեամբ ամփոփագիրներուն մէջ իրադրութիւնը ներկայացուած է վերահսկելի, մինչդեռ 5 Նոյեմբերին հակառակորդի խումբերը արդէն յաջողած էին ներթափանցել Շուշի։
