Աւելի քան 600 պաղեստինցի քաղբանտարկեալներ սաստիկ հիւանդ են

Աւելի քան 600 պաղեստինցի քաղբանտարկեալներ սաստիկ հիւանդ են

Բանտարկեալներու եւ նախկին բանտարկեալներու գործերու մարմինի ուսումնասիրութիւններու եւ փաստաթուղթերու բաժնի ղեկավար Ապտէլ Նասէր Ֆարուանա ըսած է, որ աւելի քան 600 բանտարկեալներ կը տառապին հիւանդութեամբ, այդ շարքին՝ տասնեակները, որոնք կը տառապին լուրջ հիւանդութիւններէ, ինչպիսիք են՝ սրտի, երիկամներու անբաւարարութիւնը, կաթուածը եւ քաղցկեղը: Անոնց մէջ կան նաեւ մարդիկ, որոնք կորսնցուցած են իրենց անձնական կարիքները բաւարարելու ունակութիւնը՝ առանց ուրիշներու օգնութեան։

Ըստ Ֆարուանայի՝ այս հիւանդներուն մօտ դրսեւորուած են հիւանդութեան ախտանիշներ եւ եթէ միւսներուն մօտ համապարփակ հետազօտութիւններ կատարուին, ես համոզուած եմ, որ այդ թիւը աւելի է:

Աւելի վաղ, Ապտէլ Նասէր Ֆարուանա ըսած էր, որ «հրէական բանտերուն մէջ գտնուող 4600 բանտարկեալներուն մօտ 600 հիւանդ կայ: Անոնցմէ ոմանք կը տառապին քրոնիկ եւ վտանգաւոր հիւանդութիւններէ, ինչպիսիք են՝ քաղցկեղը, որոնք հրատապ միջամտութեան կարիք ունին իրենց կեանքը փրկելու համար: Ոմանք ալ կան, որ այլեւս չեն կրնար բաւարարել իրենց կարիքները առանց ուրիշներու օգնութեան, եւ կան որոնք բոլոր մակարդակներու վրայ հրատապ, արդիւնաւէտ եւ ազդեցիկ քայլերու կարիք ունին՝ ապահովելու համար անոնց ազատ արձակումը, քանի դեռ ուշ չէ»։

Ան նաեւ նշած է, որ «աւելի քան 400 պաղեստինցի բանտարկեալներ անցեալ տասը տարիներու ընթացքին անհատական հացադուլ իրականացուցած են, որոնց մեծ մասը դէմ եղած է վարչական կալանքին՝ որպէս դիմադրութեան արարք, հաշուի առնելով միջազգային կառոյցներու անկարողութիւնը եւ լռութիւնը ի դէմ այս շարունակուող յանցագործութեան»։

 

Իսրայէլի բանտերուն մէջ գտնուող վարչական բանտարկեալները 13-րդ օրն է կը շարունակեն պոյքոթը դատարաններուն նկատմամբ՝ պահանջելով դադրեցնել վարչական կալանքի քաղաքականութիւնը՝ «Մեր որոշումը ազատութիւնն է» կարգախօսով։