15.09c
Երեվան
ուրբ, նմբ 22
Օրերս Հայց. Առաքելական Եկեղեցւոյ ԱՄՆ Արեւմտեան Թեմը գումարած է այս տարուայ 3-րդ եւ վերջին կրօնական հաւաքը։
Ասոր մասին «Արեւելք» իմացաւ ԱՄՆ Արեւմտեան Թեմի մամլոյ դիւանէն։
Ստորեւ տարածուած հաղորդագրութիւնը։
Արեւմտեան թեմի տարեկան 3րդ եւ այս տարուայ վերջին հաւաքը տեղի ունեցաւ Հոկտեմբերի 8ին, որին մասնակցում էին թեմի երեք տասնեակից աւելի հոգեւորական։
Եկեղեցական օրացոյցի համաձայն, Հոկտեմբերին նշւում է Սրբոց Թարգմանչաց տօնը եւ Մշակոյթի ամիս։
Ընդհանրական աղօթքից ու բարի գալստեան մաղթանքներից յետոյ, Արեւմտեան թեմի առաջնորդ Յովնան արք. Տէրտէրեանը նշեց. «Այսօր մէկ անգամ եւս համախմբուել ենք քննելու մեր հոգեւոր պարտականութիւնների ընթացքը, եւ ամենակարեւորը սերտելու ժամանակի պահանջները, որպէսզի համապատասխան լուծումներ գտնենք առաւելագոյնս կատարելու համար մեր եկեղեցական առաքելութիւնը», ապա պատմեց Մայր Աթոռում տեղի ունեցած հոգենորոգ արարողութիւնների՝ սրբալոյս Միւռոնի օրհնութեան եւ Մայր տաճարի վերանորոգութեան մասին։
Սրբազանն իր զեկոյցի մէջ անդրադարձաւ մի քանի կարեւոր հարցերի, ինչպիսիք են հոգեւորականների պատրաստութեան խնդիրը, թեմի 100ամեակի տօնակատարութիւնների կազմակերպումը եւ եկեղեցական կեանքում աշխարհականների ներգրաւածութեան կարեւորութիւնը։ Ապա ուրախութեամբ տեղեկացրեց, որ առաջնորդարանի աշխատակից Հայկ Մադոյեանի աշխատասիրութեամբ հրատարակութեան է պատրաստւում գրաբար Աստուածաշունչը։ Մասնակիցները տեղեկացան նաեւ, որ թեմի յոբելեանական տարեդարձի կապակցութեամբ հրատարակութեան է պատրաստւում է մի այլ կարեւոր հատոր եւս, որը պարունակելու է Արեւմտեան թեմի ընդարձակ պատմութիւնը։
Վերջում առաջնորդը հոգեւոր սպասաւորներին յորդորեց աւելիով օգտուել առաջնորդարանի հովանու ներքոյ գործող կառոյցներից՝ նրանց ներգրաւելով ծխական եւ համայնքային կեանքում։
Քննարկումներ եղան ժողովրդին յուզող զանազան հարցերի, ինչպէս նաեւ տարբեր իրավիճակներում եկեղեցու դիրքորոշման եւ այլ խնդիրների մասին։
Յաջորդ բանախօսի՝ դոկտ․ Հրաչ սարկաւագ Չիլինգիրեանի նիւթը եկեղեցու եւ Արեւմտեան թեմի նոր ծրագրուող աշխատանքների բազմակողմանի ներկայացումն էր։ Դասախօսութեան առանձնայատկութիւններից մէկն այն էր, որ ներկայ մասնակիցներին նախապէս ուղարկուել էր նիւթին բնորոշ թեմաները, որպէսզի նրանք սեփական մտածողութիւնն ու հայեացքները շաղախէին քննարկմանը՝ այն գաղափարից վերածելով իրականութեան։
Օրուայ երկրորդ կէսին, թեմի Շաբաթօրեայ դպրոցների հոգեւոր տեսուչ, բարեշնորհ Յովհաննէս սարկաւագ Գումրույեանը ներկայացրեց կրթական օրէնսդրութեան նոր փաթեթը եւ դրա առանձնայատկութիւնները, որոնք կապուած են թեմի շաբաթօրեայ վարժարանների պետական հաւաստագիր ստանալու հրաշալի իրողութեան հետ, որից յետոյ առիթ ընձեռնուեց ներկայ հոգեւորականներին, որ իրենց սեփական փորձառութիւնը կիսեն ծառայակից եղբայրների հետ՝ շեշտելով հոգեւոր կոչման ու աղօթական կենցաղի կարեւորութիւնը։
Սիրոյ եւ միաբանութեան ջերմ մթնոլորտն իր բարձրակէտին հասաւ, երբ յատուկ աղօթքների ու շարականների երգեցողութեամբ ժողովասենեակ բերուեց նոր օրհնուած Միւռոնը։ Այն որպէս «Դրոշմ Ինքնութեան» բաժանուեց քահանայ հայրերին՝ այն վստահութեամբ, որ Սուրբ Իւղը լինելու է նոր վերածննդի ու հոգեւոր յաղթութեան երաշխիք։
Հոգեւորականների միօրեայ ժողովն աւարտուեց սրբազանի «Պահպանիչ»ով։
