-16.91c
Երեվան
շբթ, հնվ 03
Մայիսի 20-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց պաշտօնական այցով Հայաստանում գտնուող Լիտուայի Հանրապետութեան նախագահ Գիտանաս Նաուսեդային:
Հանդիպմանը ներկայ էին ՀՀ առողջապահութեան նախարար Անահիտ Աւանեսեանը եւ երկու երկրների դեսպանները:
Նորին Սրբութիւնը ողջունեց Լիտուայի նախագահի այցը Հայաստան եւ Մայր Աթոռ Սուրբ Էջմիածին, ապա ներկայացրեց Հայոց Եկեղեցու ազգապահպան առաքելութիւնը հայ ժողովրդի կեանքում: Վեհափառ Հայրապետը գոհունակութեամբ արձանագրեց, որ երկու երկրների միջեւ շարունակում են զօրանալ եւ ամրապնդուել բարեկամական կապերն ու փոխգործակցութիւնը:
Անդրադառնալով տարածաշրջանում տիրող բարդ իրավիճակին` Նորին Սրբութիւնն իր մտահոգութիւնն արտայայտեց Հայաստանի եւ Արցախի նկատմամբ Ադրբեջանի կողմից շարունակուող ոտնձգութիւնների, վերջինիս վերահսկողութեան տակ յայտնուած տարածքներում հայկական հոգեւոր-մշակութային ժառանգութեան ոչնչացման եւ իւրացման փաստերի առնչութեամբ` Ադրբեջանի որդեգրած այդ դատապարտելի քաղաքականութեան կանխման եւ Արցախի ժողովրդի ազատ ու անկախ կեանքի իրաւունքի պաշտպանութեան հարցում անհրաժեշտ եւ կարեւոր նկատելով նաեւ միջազգային հանրութեան կողմից հետեւողական ջանքերի գործադրումը:
Իր հերթին Լիտուայի Հանրապետութեան նախագահ Գիտանաս Նաուսեդան շնորհակալութիւն յայտնեց Նորին Սրբութեանը ջերմ ընդունելութեան համար` անդրադարձ կատարելով երկու երկրների եւ ժողովուրդների կեանքում Եկեղեցիների եւ քրիստոնէական հաւատի դերակատարութեանը: Նախագահը նաեւ կարեւորեց ջանքերի ներդրումը տարածաշրջանում խաղաղութեան եւ կայունութեան հաստատմանն ի նպաստ:
Զրոյցի ընթացքում Վեհափառ Հայրապետն իր երախտագիտութիւնը յայտնեց ի դէմս նախագահի Լիտուայի իշխանութիւններին արցախեան պատերազմի ընթացքում եւ յետպատերազմեայ շրջանում Հայաստանին ցուցաբերած աջակցութեան, ինչպէս նաեւ Լիտուայի հայկական համայնքի նկատմամբ հոգատար վերաբերմունքի համար: Խօսելով ներկայիս երկրի առջեւ ծառացած ներքին եւ արտաքին մարտահրաւէրների մասին` Նորին Սրբութիւնը վստահութիւն յայտնեց, որ հայ ժողովուրդը Աստծոյ ողորմութեամբ եւ իր ամուր հաւատով ու հաստատակամութեամբ կյաղթահարի այս ծանր փորձութիւնը եւ առկայ բոլոր դժուարութիւնները:
