-3.91c
Երեվան
երկ, դկտ 22
Փետրուարի 7-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Խորուաթիայի Հանրապետութեան արտաքին եւ եւրոպական գործերի նախարար Գորդան Գրլիչ Ռադմանի գլխաւորած պատուիրակութեանը:
Հանդիպմանը Նորին Սրբութիւնը հիւրերին ներկայացրեց Հայ Եկեղեցու ունեցած առանձնայատուկ դերակատարութիւնը հայ ժողովրդի կեանքում` նշելով, որ այսօր էլ Հայ Եկեղեցին շարունակում է իր այդ կարեւոր առաքելութիւնը:
Հայոց Հովուապետը յոյս յայտնեց, որ պատուիրակութեան այցը Հայաստան խթան կը հանդիսանայ երկու երկրների բարեկամական յարաբերութիւնների զօրացման եւ արդիւնաւէտ համագործակցութեան ամրապնդման գործում:
Անդրադարձ կատարելով տարածաշրջանում տիրող դժուարին կացութեանը եւ Ադրբեջանի կողմից Լաչինի միջանցքի արգելափակմանը` Նորին Սրբութիւնն իր մտահոգութիւնը յայտնեց Արցախի ժողովրդի խաղաղ ու ազատ ապրելու իրաւունքի դէմ նոր ոտնձգութիւնների եւ դրանց հետեւանքով ստեղծուած հումանիտար աղէտի առնչութեամբ: Հայոց Հայրապետը կարեւոր նկատեց միջազգային հանրութեան, այդ թւում` Խորուաթիայի հետեւողական ջանքերի գործադրումը Լաչինի միջանցքի վերաբացման, Ադրբեջանի վերահսկողութեան տակ անցած տարածքում հայկական հոգեւոր եւ պատմամշակութային ժառանգութեան անաղարտ պահպանութեան ուղղութեամբ, ինչպէս նաեւ Հայաստանի սահմանների նկատմամբ Ադրբեջանի կողմից դրսեւորուող նկրտումների կանխման գործում:
Հանդիպմանն Ամենայն Հայոց Կաթողիկոսն անդրադարձաւ նաեւ հայ գերիների վերդարձման խնդրին` ակնկալելով, որ Խորուաթիայի իշխանութիւնները եւս գործուն քայլեր կը ձեռնարկեն այս ուղղութեամբ:
Իր հերթին նախարար Գորդան Գրլիչ Ռադմանը, շնորհակալութիւն յայտնելով ջերմ ընդունելութեան համար, ընդգծեց, որ պատուիրակութեան այցը Հայաստան նաեւ նպատակ է հետապնդում, ըստ ամենայնի, ծանօթանալու տարածաշրջանում ստեղծուած իրավիճակին եւ իրենց նպաստը բերելու խնդրի խաղաղ կարգաւորմանը:
