1.09c
Երեվան
շբթ, փտր 28
Ապրիլի 21-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Յորդանանի Հաշիմեան թագաւորութեան Սենատի Յորդանան-Եւրոպական խորհրդարան բարեկամութեան ասոցիացիայի նախագահ Խալդուն Հինայի գլխաւորած պատուիրակութեանը` ուղեկցութեամբ ՀՀ ԱԺ Հայաստան-Յորդանան բարեկամական խմբի ղեկավար Արթուր Դաւթեանի:
Հանդիպմանը Նորին Սրբութիւնը, ողջունելով հիւրերի այցը Հայաստան եւ Մայր Աթոռ Սուրբ Էջմիածին, յոյս յայտնեց, որ այն առաւել կը զօրացնի երկու խորհրդարանների յարաբերութիւնները` մեծապէս նպաստելով երկրների միջեւ յետագայ սերտ գործակցութեանը:
Վեհափառ Հայրապետը, վերհիշելով իր այցը Յորդանան, ինչպէս նաեւ հանդիպումները Յորդանանի թագաւորի հետ Յորդանանում եւ Սուրբ Էջմիածնում, գոհունակութեամբ հաստատեց հայ համայնքի նկատմամբ Յորդանանի իշխանութիւնների կողմից ցուցաբերուող հոգատար վերաբերմունքը` որպէս ձեւաւորուած դարաւոր բարեկամական յարաբերութիւնների լաւագոյն դրսեւորում: Հայոց Հովուապետը արձանագրեց նաեւ, որ Հայոց ցեղասպանութիւնը վերապրած մեր ժողովրդի զաւակները կարողացել են ապաստան գտնել Յորդանանում եւ կազմակերպել իրենց ազգային-հոգեւոր կեանքը` օգտակար ներդրում բերելով երկրի առաջընթացին:
Իր հերթին պարոն Խալդուն Հինան Վեհափառ Հայրապետին փոխանցեց Յորդանանի ժողովրդի եւ յորդանանահայութեան ողջոյնները:
Զրոյցի ընթացքում անդրադարձ կատարուեց նաեւ արցախեան 44-օրեայ պատերազմին եւ դեռեւս չյաղթահարուած հետեւանքներին, Արցախի ժողովրդի խաղաղ ու անկախ կեանքի դէմ շարունակուող ոտնձգութիւններին: Խօսելով Ադրբեջանի վերահսկողութեան տակ յայտնուած տարածքներում հայկական հոգեւոր-մշակութային ժառանգութեան պահպանութեան խնդիրների, սրբավայրերի, խաչքարերի, շիրմաքարերի պղծման եւ ոչնչացման դէպքերի մասին` Նորին Սրբութիւնը նկատեց, որ Ադրբեջանի որդեգրած այս քաղաքականութիւնը հարիր չէ իսլամի ոգուն, եւ յոյս յայտնեց, որ այն իսլամական աշխարհի կողմից կ'արժանանայ խիստ դատապարտութեան:
Յորդանանի Հաշիմեան թագաւորութեան Սենատի Յորդանան-Եւրոպական խորհրդարան բարեկամութեան ասոցիացիայի նախագահը վերահաստատեց, որ Յորդանանը կարեւորում է հակամատութիւնների խաղաղ կարգաւորումը եւ ողջունում դրան ուղղուած ջանքերը:
