16c
Երեվան
երք, հնս 17
Ապրիլի 18-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում հիւրընկալեց Հայկական Բարեգործական Ընդհանուր Միութեան նախագահ տիար Պերճ Սեդրակեանին:
Ամենայն Հայոց Կաթողիկոսը եւ ՀԲԸՄ նախագահն անդրադարձան հայրենական եւ ազգային կեանքում առկայ մարտահրաւէրներին եւ դրանց յաղթահարմանն ուղղուած Հայոց Եկեղեցու եւ տարբեր ազգային հաստատութիւնների կողմից ձեռնարկուող կրթական, սոցիալական եւ զարգացման ծրագրերին:
Զրոյցի ընթացքում խօսուեց Մայր Աթոռ Ս. Էջմիածնի եւ ՀԲԸՄ երկարամեայ համագործակցութեան մասին, որն արդիւնաւորուել է բազում օզգօգուտ եւ եկեղեցաշէն ծրագրերով: Այս առիթով Վեհափառ Հայրապետն իր օրհնութիւնն ու բարեմաղթանքները բերեց ՀԲԸՄ նախագահ Պերճ Սեդրակեանին` բարձրօրէն գնահատելով Միութեան կողմից դրսեւորուող ոգին ու գիտակցութիւնը եւ Մայր Աթոռին ու Հայոց Եկեղեցու աշխարհասփիւռ թեմերին ցուցաբերուող շարունակական զօրակցութիւնը:
Ազգի առջեւ ծառացած արդի խնդիրներին յանդիման Ամենայն Հայոց Կաթողիկոսը եւ ՀԲԸՄ նախագահը յատկապէս կարեւորեցին երիտասարդ սերնդի կրթութեանն ու հայեցի դաստիարակութեանը, ազգային ինքութեան պահպանութեանն ու ազգային ոգու զօրացմանը ուղղուած ծրագրերի խթանումը:
Մասնաւոր անդրադարձ կատարուեց Արցախի շուրջ մտահոգիչ զարգացումներին, Արցախի ազատ ու անկախ կեանքի դէմ ոտնձգութիւններին եւ արցախցիների կեանքում առկայ դժուարութիւններին: Ընդգծուեց անհրաժեշտութիւնը համազգային հետեւողական ջանքերի գործադրման ի նպաստ Արցախի մեր ժողովրդի իրաւունքների պաշտպանութեան եւ խնդիրների յաղթահարման:
Հանդիպման ընթացքում Նորին Սրբութիւն Գարեգին Երկրորդ Ամենայն Հայոց Կաթողիկոսը եւ ՀԲԸՄ նախագահ Պերճ Սեդրակեանն արծարծեցին մի շարք հարցեր, որոնք վերաբերում էին սփիւռքի համայնքային կեանքին, ձեւաւորուող նոր համայնքներին, հայապահպանութեան խնդիրներին, ինչպէս նաեւ երիտասարդութեան ազգային եւ հոգեւոր պատշաճ խնամատարութեան եւ սփիւռքի ազգային կառոյցների եւ հաստատութիւնների զօրացման կարեւորութեանը: Կարեւոր նկատուեց սփիւռքի ներուժի գնահատումը եւ համակարգուած ծառայեցումը աշխարհասփիւռ համայնքների ազգային կեանքի աշխուժացմանը եւ հայրենական կեանքի առաջընթացին եւ բարօրութեանը: Քննարկուեցին հնարաւոր ուղիները, որոնցով Եկեղեցին եւ ՀԲԸՄ կարող են սփիւռքին եւ յատկապէս երիտասարդութեանը ներգրաւել հայրենիքի հզօրացմանն ուղղուած ծրագրերում եւ նախաձեռնութիւններում:
