16.09c
Երեվան
երք, մյս 05
Հայաստանի Լեզվի կոմիտեն ամփոփել է հայերենի 2022 թվականի «Տարվա բառ»-ն ընտրելու քվեարկությունը։
Ընտրության համար առաջարկվել էր12 բառ (այբբենական կարգով), որոնցից Լեզվի կոմիտեի առցանց հետևորդները քվեարկությամբ որոշել են «Տարվա բառը»։
Հաղթել է ԳԻՏԱՐԲՈՒՔ բառը (այս բառի օգտին քվեարկել է մասնակիցների 30%-ը):
Գիտարբուքը միջոցառում է, որի շրջանակում մարդիկ հավաքվում են «գիտությամբ արբենալու համար», այլ կերպ ասած` հրավիրվում են գիտնականներ, և սրճարանում, ազատ ու անկաշկանդ միջավայրում անցկացվում են գիտական քննարկումներ, խոսվում է գիտության մասին։ Բառը նորակազմ է, բառարանային գրանցում չունի։
Ուշագրավ է, որ առաջին տեղում գիտությանը, գիտական կյանքին առնչվող բառն է։
Երկրորդ տեղում ԲԱՆԱԿԱՇԻՆՈՒԹՅՈՒՆ բառն է (16%):
Բանակաշինությունը բանակը ստեղծելու, ձևավորելու և մշտապես բարեփոխումներ իրականացնելու գործընթացն է։ Երկրորդ տեղը զբաղեցնելը զարմանալի չէ, քանի որ բառն արդիական է և հաճախադեպ։
Երրորդ տեղում ԻՆՔՆԻՇԽԱՆՈՒԹՅՈՒՆ բառն է (11%):
Ինքնիշխանությունը երկրում բարձրագույն իշխանության գերակայությունը և միջազգային հարաբերություններում այլ իշխանություններից բացարձակ անկախությունն է։
Բառը հատկապես այժմ հաճախադեպ է, քանի որ աշխարհում տեղի ունեցող իրադարձություններին զուգահեռ կարևոր է պահպանել ինքնիշխանությունը։
Ամենաշատ ձայներ հավաքած եռյակին հաջորդում են ԱՇԽԱՐՀԱԿԱՐԳ (8%), ԱՊԱՇՐՋԱՓԱԿՈՒՄ (7%), ԳՐՔԱՏՈՆ (7%), ՏԵՍԱԲԱՑԻԿ (6%) բառերը:
«Տարվա բառ» ընտրելն ու հրապարակելը զարգացած աշխարհում ավանդույթ դարձած իրողություն է։ Ամեն տարեվերջին հրապարակվում են անգլերենի, ֆրանսերենի, գերմաներենի, ռուսերենի, իտալերենի և այլ լեզուների «Տարվա բառերը»։ Բառի ընտրությունը մեծ մասամբ կատարում են լեզվի բնագավառում աշխատող մասնագիտական խմբերը (լեզվաբաններ, բառարանագիրներ) կամ «բառարանասերների» համայնքը՝ հիմնվելով որոշակի չափանիշների վրա։ «Տարվա բառն» արտացոլում է տվյալ տարվա ընթացքում հասարակական կյանքում կատարված առավել նկատելի իրադարձություն(ներ)ը։
