23.96c
Երեվան
հնգ, օգս 13
«Հանրային ձայն» կուսակցութիւնը աջակցեցաւ «Քաղաքացիական Պայմանագիր»-ին: Միակ բանը, որ այս իմաստով պէտք է պարզել, այն է, թէ ինչ ուզած է եւ ինչ ստացած է Հանրային ձայնը ՔՊ-էն՝ իր աջակցութեան դիմաց։ Այս մասին իր դիմատետրեան էջին գրած է Երեւանի նախկին քաղաքապետ, «Ազգային առաջընթաց» խմբակցութեան աւագանիի անդամ Հայկ Մարութեանը:
«Սիրելի երեւանցիներ, սիրելի հայրենակիցներ,
Ինչպէս տեսանք, Երեւանի քաղաքապետի ընտրութեան հարցում ոչ մի անակնկալ չեղաւ։ Տեղի ունեցաւ այն, ինչ մենք կանխատեսել էինք օրեր առաջ։
Ուզում եմ յիշեցնել մեր սիրելի համաքաղաքացիներին, որ սեպտեմբերի 17-ի ընտրութեան արդիւնքում ՔՊ-ն աւագանիում ստացաւ փոքրամասնութիւնը՝ 24 ձայն, հետեւաբար՝ ընդդիմութիւնը ռէալ շանս ունէր մերժելու ՔՊ-ին, եթէ առնուազն 33 աւագանու անդամ քուէարկէր ընդդիմութեան թեկնածուի օգտին։
Բոլոր ընդդիմադիր կուսակցութիւնները կարող էին նաեւ բոյկոտել այսօրուայ աւագանու նիստը՝ այդպիսով կանխելով ՔՊ վերարտադրութիւնը Երեւանում։
Բայց «Հանրապետութիւն» կուսակցութիւնը ցոյց տուեց, որ իրականում ընդդիմութիւն չէ, եւ ընտրեց ՔՊ թեկնածուին։ Այսինքն, արձանագրենք, որ «Հանրապետութիւն» կուսակցութեանը ձայն տուողները ընտրել են ՔՊ-ն։
Ինչ վերաբերում է «Հանրային ձայն»-ին, ապա այս կուսակցութիւնը նախ իր ձայները փորձում էր վաճառել ընդդիմութեանը՝ փոխարէնն ինչ-որ պաշտօններ ուզելով։ Մենք դեռ այն ժամանակ յայտարարեցինք, որ այդ առաջարկը անօրինական է՝ վարչութեան պետերն ընտրւում են մրցութային կարգով եւ չեն կարող քաղաքական պայմանաւորուածութեան առարկայ լինել։
Յետոյ պարզուեց նաեւ, որ Հանրային Ձայնն առհասարակ չունի բաւարար ձայներ, որովհետեւ նրանց ցուցակից մէկը բանտում է, միւսը՝ արտասահմանում։ Այդ մարդիկ ի հարկէ, կարող էին հրաժարուել իրենց մանդատներից եւ տեղը զիջել ուրիշներին, բայց չգիտես ինչու, չարեցին այդ։ Հետեւաբար, եթէ «Հանրային ձայն»-ն իսկապէս դէմ էր ՔՊ-ին, նրանց մնում էր ընդամէնը բոյկոտել այսօրուայ նիստը եւ բացառել ՔՊ թեկնածուի ընտրութիւնը։
Բայց դա տեղի չունեցաւ։
Այսինքն, այստեղ եւս փաստենք, որ «Հանրային ձայն» կուսակցութիւնը աջակցեց ՔՊ-ին։ Միակ բանը, որ այս իմաստով պէտք է պարզել, այն է, թէ ինչ է ուզել եւ ինչ է ստացել Հանրային ձայնը ՔՊ-ից՝ իր աջակցութեան դիմաց։
Ինչեւէ, այս պայմաններում ՔՊ թեկնածուն դարձաւ քաղաքապետ՝ փաստացի երեւանցիների տուած ձայների, ինչպէս նաեւ՝ աւագանու անդամների ձայների փոքրամասնութեամբ։
Մենք ուզում ենք շեշտել, որ այս ընթացքում մէկ քայլ անգամ չենք նահանջել մեր հռչակած սկզբունքներից՝ կոալիցիա չենք կազմել ո՛չ ՔՊ-ի, ո՛չ նախկին ռեժիմի ներկայացուցիչների հետ, ոչ էլ գործարքի ենք գնացել բարոյականութեան եւ օրինականութեան հետ լուրջ կոնֆլիկտի մէջ գտնուող ուժի հետ։
Շնորհակալ եմ երեւանցիներին, որոնք սեպտեմբերի 17-ին մեզ ընտրեցին։ Մենք Ձեզ տուած մեր խոստմանը հաւատարիմ ենք մնալու։ Շարունակելու ենք մեր աշխատանքը այդ դիրքերից Երեւանի աւագանում՝ ի շահ մեր քաղաքի եւ մեր երկրի։ Մեզ՝ բարի երթ։
Իսկ ՔՊ՝ փոքրամասնութեան իշխանութիւնը պէտք է հեռանայ»։
