14.92c
Երեվան
կրկ, հնս 14
ՀՀ կառավարութեան ղեկավարին երէկուայ յայտարարութիւնները խիստ վտանգաւոր են թէ՛ Հայաստանի, թէ՛ Արցախի համար: Այս մասին ֆէյսպուքեան իր էջով գրած է ՀՀ նախկին ՄԻՊ Արման Թաթոյեանը:
«Հայաստանի անվտանգութեան համակարգն ուղղակի աւերւում է նման յայտարարութիւններով, որոնք պայմանաւորուած են քաղաքական նեղ շահերով եւ չունեն մասնագիտական հիմքեր:
Այս կերպ են պատերազմի աւարտից սկսած միջազգային հանրութիւնից թաքցուել ատրպէյճանական յանցաւոր արարքների մանրամասները: Այդ փաստերը թաքցուել են նաեւ ներքին հանրութիւնից ու Սփիւռքից:
Լուրջ ճնշումների են ենթարկուել ու շարունակում են ենթարկուել այդ փաստերը բարձրաձայնողները: Տեղի է ունենում պարզապէս ինֆորմացիոն բլոկադա:
Սեփական սխալները կոծկելու եւ դժգոհութիւններ առաջ չբերելու համար ՀՀ բարձրաստիճան տարբեր ղեկավար պաշտօնեաների կողմից արդարացուել ու օրինականացուել են մեր գիւղերի հարեւանութեամբ ու ճանապարհներին ադրբեջանական անօրինական զինուած տեղակայումները, սեփական քաղաքական շահերի համար արուել են Հայաստանի տարածքային իրաւազօրութիւնը Ատրպէյճանին զիջող պաշտօնական յայտարարութիւններ` անտեսելով Հայաստանի ու Արցախի բնակչութեան անվտանգութիւնը, կեանքի եւ միւս իրաւունքները:
Այս պաշտօնեաները նաեւ հետեւողականօրէն զրոյացրել են պատմական նշանակութեան մեր հիմնարար թեզերը` սկսած նրանից, որ Ատրպէյճանի տարածքային ամբողջականութիւնը որեւէ կապ չունի Արցախի հետ եւ չի էլ ունեցել, անտեսուել է, որ ադրբեջանական պետական դոկտրինայում Հայաստանի զգալի մասը համարւում է «ատրպէյճանական պատմական տարածք» եւ որ մեր նկատմամբ տարւում է ֆաշիզմի հասնող ատելութեան ու թշնամանքի քաղաքականութիւն եւ այլն:
Այս ամէնը միջազգային ասպարէզում ազատել է Ատրպէյճանի ձեռքերը եւ հնարաւորութիւն տուել աշխարհը կեղծիքներով լցնելու հաշուին զբաղեցնելու իր շահերի համար նպաստաւոր դիրքեր, իսկ մեզ դրել աշխարհաքաղաքական շահերի յորձանուտի մէջ:
Դատապարտելի կերպով առաչ քաշուեց եւ սկսուեց աշխարհին գովազդուել, այսպէս կոչուած, «խաղաղութեան» օրակարգը այն դէպքում, երբ Ատրպէյճանը մեզ հետ խաղաղութեան մասին շարունակում է խօսել միայն աւերելու ու ոչնչացնելու սպառնալիքներով եւ շարունակում իր յանցաւոր արարքները: Զուգահեռ` Հայաստանում սկսուեցին մարդկանց զգօնութիւնը թմրեցնող յայտարարութիւններ` առանց մէկ գրամ անգամ տեսնելու այդ օրակարգի արդիւնքները:
Արդիւնքում` «խաղաղութիւնը» մնաց միայն մեզ վրայ եւ ստացուեց այնպէս, որ դա պէտք է իրականացուի մեր իրաւունքների ու արժանապատուութեան, Հայրենիքի հաշուին` ինչ է, թէ Հայաստանում կան պաշտօնեաներ, որոնք իրենց քաղաքական շահերն ու պաշտօնների պահպանումը երկրի անվտանգութիւնից աւելի են գերադասում:
Ուստի, ՀՀ կառավարութեան ղեկավարի ու, առհասարակ, որեւէ այլ պաշտօնեայի կամ պետական մարմնի նման որեւէ յայտարարութիւն չունի լեգիտիմութիւն եւ չի կարող դրուել մեր ժողովրդի շահերի պաշտպանութեան հիմքում», գրած է ան:
