ՀՀ քաղաքացիները պիտի տեսնեն, որ ամէն բառ, որ մենք ըսած ենք նախընտրական քարոզարշաւի ընթացքին, այդ բառերը կեանքի մէջ պիտի ստանան իրենց արտայայտութիւնը։ Այս մասին 26 օգոստոսին, Ազգային ժողովէն ներս ելոյթ ունենալու ժամանակ ըսած է ՀՀ վարչապետ Նիկոլ Փաշինեանը։
Անդրադառնալով «Քաղաքացիական պայմանագիր» խմբակցութեան պատգամաւոր Հայկ Կոնջորեանի՝ դիրքաւորուելու եւ խրամատաւորուելու հետ կապուած ելոյթին՝ վարչապետը ըսած է.
«Պարոն Կոնջորեան, ոչ մի անակնկալ չկայ, որովհետեւ այն ժամանակ, երբ «Հայաստան» դաշինքի ղեկավարը յայտարարում էր, որ իրենք Խորհրդարանում մանդատները վերցնելու են, յայտարարել է բառացիօրէն հետեւեալը՝ մարտական գործողութիւնների ժամանակ երբ խնդիրը չի լուծուում, բայց դու վերցնում ես խրամատներ, այդ խրամատները ոչ թէ պէտք է պահես, այլ ամրացնես՝ հետագայ գրոհի համար։ Ես կարծում եմ, որ այն մարդիկ, որոնք գրոհի մտադրութիւններ ունեն, բանախօսներից մէկի այլաբանութեամբ, երբ ստանում են քաղաքական հակահարուածներ, պիտի հասկանան, որ գրոհի երազանքը իրենց մտքերից պէտք է դուրս բերեն։ Այստեղ փորձ արուեց վիճարկել, թէ ընտրութիւնների արդիւնքներով արդեօք ներքաղաքական ճգնաժամը յաղթահարուել է, այո ընտրութիւնների արդիւնքներով ներքաղաքական ճգնաժամը յաղթահարուել է»,-ըսած է ան։
Ըստ Փաշինեանի՝ մեծ հաշուով իրենք ներքին մարտահրաւէր չեն ալ ունեցած. «Ու այսօր էլ չունենք եւ չենք էլ ունենալու։ Ովքեր վիճարկում են ներքաղաքական ճգնաժամը յաղթահարուած է, թէ ոչ, նրանք արտաքին ճգնաժամերի յոյս ունեն, որի ֆոնին փորձեն ներքաղաքական գրոհներ կազմակերպել. այնպիսի գրոհ, ինչպիսին փորձ են արել կազմակերպել Նոյեմբերի 9-10-ին։ Մէկը կար, ասում էր՝ ես լինէի Ալիեւի տեղը, յարձակուէի, յետոյ ոչ բարով, բախտի բերմամբ մեր ցուցակով խորհրդարանում յայտնուած մէկը դրօշակ էր բարձրացնում՝ ի ցոյց դնելով, թէ որտեղից կարող է գործել ատրպէյճանական ԶՈՒ-ն, յետոյ էլ էլի ոչ բարով որպէս էլի «Իմ քայլի» ցուցակով խորհրդարանում յայտնուած մէկը ուրիշ տեղից էր դրօշ ցոյց տալիս, թէ էլ որտեղ Հայաստանը խոցելի տեղեր ունի»։
Անդրադառնալով սիւնեցի ընդդիմադիր պատգամաւորներուն՝ Փաշինեանն ըսած է. «Եթէ սա իրենց համար խրամատ է, ուրեմն մենք պէտք է արձանագրենք, որ մեր թիկունքում դիւերսիոն առաջապահ խմբակներ են գործում եւ ըստ այդմ պէտք է այդ գործողութիւնները կասեցուի։ Մէկն էլ ասում է՝ չգիտենք, Սիւնիքը կտրուած է, թէ ոչ։ Բա ձեզ ներկայացնում էիք Սիւնիքի ներկայացուցիչներ։ Այսինքն՝ դժուա՞ր է մի հատ նիստից առաջ զանգել, իմանալ. տեսնո՞ւմ էք, որ դուք կապ չունէք, մենք ենք Սիւնիքի մասին ձեզ տեղեկութիւն տալու եւ ստանալու աղբիւրը։ Դուք ի՞նչ կապ ունէք ընդհանրապէս Սիւնիքի ժողովրդի հետ։ Ուզում էիք ներկայանայիք Սիւնիքի Դոն Կոռլեոնեներ, հիմա մէկը փախել է Անտարկտիդա, միւսն էլ իրեն փորձում էր ներկայացնել որպէս նորօրեայ Մուհամմետ Ալի»։
Միացիր մեզ Տելեգրամում
Միացիր մեզ Յութուբում
Կիսվել
