20.09c
Երեվան
երկ, հնս 23
«Արեւելք»ի Պաղտատի թղթակիցը կը փոխանցէ
Այս տարի կը լրանայ Պաղտատի Սբ. Գրիգոր Լուսաւորիչ առաջնորդանիստ եկեղեցւոյ հիմնադրութան 60 ամեակը:
Եգիպտահայ ճարտարապետ Մարտիրոս Ալթունեանի յատակագիծով, եկեղեցւոյ հիմնարկէքը կատարուած է 1954ի Նոյեմբերի 24ին ձեռամբ լուսահոգի Տ. Ռուբէն Արք. Մանասեանի: 1957ի Ապրիլ 21ին նորակառոյց եկեղեցւոյ Սբ. Սեղանի օծումն ու առաջին պատարագը մատուցած էր նախկին առաջնորդներէն լուսահոգի Տ. Զգօն Ծ. վրդ. Տ. Յակոբեան, իսկ եկեղեցւոյ ամբողջական օծումը տեղի ունեցաւ 1978ի Յունուարի 29ին ձեռամբ Մայր Աթոռ Սբ. Էջմիածնի այդ օրերու լուսարարապետ՝ Գերաշնորհ Տ. Յուսիկ Եպս. Սանթուրեանի, երջանկայիշատակ Վազգէն Ա. Հայրապետի հովուապետական այցելութեան ընթացքին:
Սբ. Գրիգոր Լուսաւորիչ եկեղեցին միշտ ալ արժանացած է Իրաքահայ Թեմի առաջնորդ Գերաշնորհ Տ. Աւագ արք. Ասատուրեանի հոգատարութեան:
Անցեալ 37 տարիներու ընթացքին Սրբազան հօր տնօրինութեամբ, եկեղեցին քանիցս ենթարկուած է վերանորգոութեան եւ բարեփոխման աշխատանքներու, որոնցմէ կը թուենք՝ տանիքի սալարկում, աւանդատան եւ ստորնայարկի կառուցում, իտալական մարմարով յատակի սալարկում, ներքուստ եւ արտաքուստ ներկելու աշխատանքներ եւ ի վերջոյ գաւիթն ու դասը քանի մը սրբապատկերներով զարդարում:
Նշենք, որ այս եկեղեցին Իրաքի զբօսաշրջիկութեան գրասենեակի կողմէ ճանչցուած է որպէս Իրաքի տեսարժան կառոյցներէն մին:
