8.09c
Երեվան
հնգ, ապր 30
Ատրպէյճանի կողմէ Հակարիի կամուրջի փակուելու հետեւանքով երկկողմանի շրջափակման մէջ յայտնուած Մեծ Շէն գիւղի բնակիչ Գեղամ Յարութիւնեանը այն քաղաքացիներէն է, որ անցած է ատրպէյճանական անցակէտով:
NEWS.am-ի հետ զրոյցին բնակիչը պատմած է, որ ապրիլ 30-ին Սիւնիքի մարզի Գորիս քաղաք գացած է սնունդ եւ անասնական կեր գնելու համար, որովհետեւ իր ունեցած պաշարներն արդէն սպառման եզրին էին:
Գեղամ Յարութիւնեանի խօսքով՝ ինքը հայկական կողմի երաշխաւորութեամբ մեկնած է Գորիս իր մեքենայով:
«Ես ռուսական կողմին չեմ դիմել, հայկական կողմին եմ դիմել, իրենց երաշխաւորութեամբ եմ գնացել»,-ըսած է Գեղամ Յարութիւնեանը:
Նշենք, որ Արցախի տեղեկատուական շտաբը ապրիլ 30-ին յայտարարած էր, որ ատրպէյճանական լրատուամիջոցներու տարածած դէպքին մէջ կ'երեւին շրջափակման մէջ յայտնուած գիւղերու բնակիչները, որոնք մնացած էին Գորիս եւ կը վերադառնային ռուս խաղաղապահներու աջակցութեամբ:
«Անցակէտում անձնագիրս եւ մեքենայիս հետ կապուած փաստաթղթերն են ստուգել, հարցրել են՝ ինչ նպատակով էի եկել, ուր եմ գնում»,- պատմած է Գեղամ Յարութիւնեանը:
Բնակչի խօսքով՝ ատրպէյճանական անցակէտին մօտ մնացած է մօտ հինգ վայրկեան: Անցակէտին վրայ եղած է մօտ տասն ատրպէյճանցի, որոնց հետ ռուսերէն խօսած է՝ թէպէտ ատրպէյճաներէնի ալ կը տիրապետէ:
Անոր խօսքով՝ ատրպէյճանցիներն իր ապրանքները չեն բացած, բայց ստուգած են սքանաւորող սարքով:
