-3.91c
Երեվան
երկ, դկտ 23
Կիրակի, 1 Ապրիլ 2018-ի Ծաղկազարդի հանդիսաւոր Ս. եւ Անմահ Պատարագէն անմիջապէս ետք, կազմակերպութեամբ Հ.Գ.Խաչի Թեսաղոնիկէի «Անի» Մասնաճիւղի, եկեղեցւոյս կից գտնուող «Տէր Զաքարեան» սրահէն ներս, տեղի ունեցաւ հանգանակութեան փոխարէն հաւաքոյթ՝ «Գաւաթ Մը Սուրճ Բարի Նպատակի Համար» խորագրով, ներկայութեամբ Գաղութիս Հոգեւոր Հովիւին, Թաղական Խորհուրդին, ինչպէս նաեւ բոլոր միութիւններու ներկայացուցիչներուն եւ հաւատացեալ ժողովուրդին, ուր Մասնաճիւղի անդամուհիներուն, ինչպէս նաեւ անհատ կամաւորներու կողմէ պատրաստուած էին տարբեր տեսակի համեղ անուշեղէններ, քաղցրեղէններ, որոնք սուրճի, թէյի, օշարակի կողքին հիւրասիրուեցան ներկաներուն։
Սոյն հաւաքոյթի ընթացքին, Հայերէն եւ Յունարէն լեզուներով խօսք ընթերցեց Մասնաճիւղի Փոխ-Ատենապետուհի՝ Տիկ. Սիլվա Գասէմեան՝ բարի գալուստ, ինչպէս նաեւ խորին շնորհակալութիւն յայտնելով բոլորին՝ իրենց նուիրատուութիւններուն կապակցութեամբ։ Ան յայտնեց, որ յիշեալ նուիրատուութիւնները պիտի յատկացուին բարի նպատակի համար յառաջիկայ գործունէութեանց մէջ։
Սոյն ձեռնարկին նպատակն էր հիւրասիրութեան ճամբով նիւթա-բարոյապէս օժանդակել եւ աջակցիլ Մասնաճիւղի տարած բոլոր աշխատանքներուն։ Աւարտին, նշուեցաւ նաեւ Մասնաճիւղի Փոխ-Ատենապետուհի՝ Տիկ. Սիլվա Գասէմեանի ծննդեան տարեդարձի կարկանդակի հատումը։
«Շնորհաւորութիւններ եւ վարձքերնիդ կատար»
Թղթակից
