2.09c
Երեվան
երք, փտր 17
Իսրայէլեան զինուժը հարուածներ հասցուցած է Սուրիոյ մէջ իրանական եւ սուրիական կառոյցներուն՝ ի պատասխան Սուրիոյ Արաբական Հանրապետութեան կողմէ վերջերս իրականացուած գնդակոծութիւններու: Այս մասին յայտարարած է Իսրայէլի վարչապետ Բենիամին Նաթանիահուն՝ զգուշացնելով Սուրիոյ իշխանութիւնները եւ նախագահ Պաշշար Ասատը, որ տարածաշրջանին մէջ լարուածութեան հետագայ սրման պարագային անոնք «բարձր գին պիտի վճարեն»։ Այս մասին գրած է ԹԱՍՍ-ը:
«Սուրիոյ մէջ մենք յարձակեցանք իրանեան թիրախներու եւ սուրիական կառավարութեան թիրախներու վրայ: Ասատի ռեժիմը քաջ կը գիտակցի, որ իրենց վճարած գինը միայն սկիզբն է: Եթէ անոնք շարունակեն թոյլ տալ, որ հրթիռներ արձակուին Իսրայէլի վրայ, Ասատի ռեժիմը ատոր համար շատ լուրջ գին պիտի վճարէ»,-ըսած է Նաթանիահուն իսրայէլեան հեռուստատեսութեամբ հեռարձակուած ուղերձին մէջ։
Ան ընդգծած է, որ Իսրայէլը չի ձգտիր սրելու լարուածութիւնը, սակայն անհրաժեշտութեան պարագային պատրաստ է «շատ հզօր գործողութիւններու բոլոր ճակատներուն վրայ» որեւէ հակառակորդի դէմ։
Իսրայէլցի զինուորականները ապրիլ 8-ի երեկոյեան արձանագրած են Սուրիայէն երեք հրթիռի արձակում. անոնցմէ մէկը թռած է Իսրայէլի տարածք եւ ինկած Կոլանի բարձունքներու անմարդաբնակ տարածքին մէջ։ Քանի մը ժամ անց Սուրիոյ տարածքէն Իսրայէլի ուղղութեամբ արձակուած է եւս երեք հրթիռ, որոնցմէ երկուքը թռած է հրէական պետութեան տարածք, յայտնած են բանակի մամուլի ծառայութենէն։
Զինուորականները պարզաբանած են, որ երկրորդ յարձակման ժամանակ մէկ հրթիռ ինկած է անմարդաբնակ տարածքի մէջ, երկրորդը որսացած է հակաօդային պաշտպանութեան համակարգը։ Ի պատասխան՝ իսրայէլեան կործանիչները գրոհած են սուրիական բանակի չորրորդ բաժանումի ռազմական համալիրը, ռատիոտեղորոշիչ համակարգերը եւ հրետանային դիրքերը, յայտնած է Իսրայէլի բանակի մամուլի ծառայութիւնը։
