Արեվելք - Արևելք լրատուական

254
02/07/2021

Ամենայն Հայոց Կաթողիկոսն իր օրհնութիւնը բաշխեց վերջերս «Գանձասար»ի մէջ օծուած Աթանաս աբեղայ Սարգսեանին

Յուլիսի 2-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց նորաօծ Տ․ Աթանաս աբեղայ Սարգսեանին՝ ուղեկցութեամբ Արցախի թեմի առաջնորդ Տ․ Վրթանես եպիսկոպոս Աբրահամեանի: Հայր Աթանասը վերջերս է արժանացել քահանայական կոչման Գանձասարի վանքում եւ քառասնօրեայ պահեցողութեան շրջանն անցկացրել Դադիվանքում։

Հանդիպման սկզբում Վրթանես եպիսկոպոսը ներկայացրեց Հայր Աթանասին՝ անդրադառնալով Հայր Սուրբի ծառայութեանը նախ ՀՀ Զինուած ուժերի Հոգեւոր Առաջնորդութիւնում եւ ապա Արցախի թեմում: Սրբազան Հայրը մասնաւորապէս ընդգծեց, որ Հայր Աթանասն իր ծառայութեամբ մշտապէս արդարացրել է հոգեւոր առաջնորդի սպասելիքները եւ ամէնուրեք արժանացել յարգանքի ու բարձր գնահատանքի։

Այնուհետեւ Ամենայն Հայոց Կաթողիկոսն հայրական իր օրհնութիւնն ու շնորհաւորանքները բերեց Հայր Աթանասին ձեռնադրութեան եւ անդրանիկ պատարագի մատուցման առիթով։ Հայոց Հովուապետը նաեւ իր գնահատանքը յայտնեց երիտասարդ եկեղեցականին Դադիվանքում դժուարին պայմաններում նուիրեալ ծառայութեան եւ դրսեւորած բարձր պատասխանատուութեան համար։

Վեհափառ Հայրապետը Արցախի թեմի առաջնորդի հետ զրոյցում անդրադարձ կատարեց Դադիվանքում բնակուող եկեղեցականների ծառայութեան պայմաններին, վանքի հոգեւոր առաքելութեանը եւ ուխտաւորների այցելութիւններին խոչընդոտող հանգամանքներին եւ այդ ուղղութեամբ ձեռնարկուող քայլերին։ Նորին Սրբութիւնը վստահութիւն յայտնեց, որ ժամանակի ընթացքում առկայ դժուարութիւնները կը հարթուեն:

Վերջում Հայոց Հայրապետը «Պահպանիչ» աղօթքով օրհնեց նորաօծ Աթանաս աբեղային՝ մաղթելով ամուր հաւատ եւ բեղուն հոգեւոր սպասաւորութիւն ի փառս Աստծոյ եւ ի պայծառութիւն Հայոց Եկեղեցու։