-3.91c
Երեվան
հնգ, դկտ 26
Այսօր Երեւան կը ժամանէ Իրանի Իսլամական Հանրապետութեան նախագահ Հասան Ռուհանի: Պաշտօնական այս այցը առաջինն է 2013-ին Իրանի ղեկը ստանձնած Ռուհանիին համար:
Տակաւին մեր յիշողութեան մէջ է, թէ ինչ պայմաններու տակ կրօնական այս գործիչը ընտրուեցաւ Իրանի նախագահ եւ անսպասելի դրական տեղաշարժ ապահովեց երկրի մը համար, որ երկար ժամանակէ ի վեր դարձած էր արեւմուտքի «աչքի փուշը»:
Հանդարտաբարոյ, քաղաքական էթիքայի կանոններուն քաջածանօթ եւ իր բոլոր յայտարարութիւններուն մէջ զուսպ ու հաւասակշիռ այս գործիչը Իրանը դուրս բերաւ «պաշարման օղակ»էն եւ աշխարհին բացատրեց, որ Կովկասեան տարածաշրջանին մէջ Թեհրանը կարեւոր եւ հիմնարար ներկայութիւն է:
Չմոռնանք յիշել, որ նոյն Ռուհանիի ջանքերուն շնորհիւ էր նաեւ, որ ստորագրուեցաւ Իրան 5+1 երկիրներու կորիզային համաձայնութիւնը, որ շատ մը փորձագէտներու կարծիքով նոր ճանապարհ բացաւ Իրան- Արեւմուտք յարաբերութիւններու վերադասաւորման:
Հայաստանի հարեւան Իրանը հզօր երկիր է ու հզօր դաշնակից:
Բոլորս կը գիտակցինք այդ փաստին ու կը գիտակցինք նաեւ, որ հազարամեայ արմատներ եւ իմաստութիւն ունեցող պարսկական քաղաքականութիւնը հիմնուած է արդար չափորոշիչներու, դրական զարգացման եւ մարդկային քաղաքակրթութեան ամէնէն բարձր արժանիքներուն վրայ:
Այս բոլորէն անդին պէտք է անպայման շեշտադրել, որ Հայաստանի Հանրապետութեան Իրանի հանդէպ ունեցած բարի դրացիական, հաւասակշիռ եւ բարեկամութեան վրայ հիմնուած յարաբերութիւններն ու կեցուածքները անպայման որ իրենց արդիւնքը պիտի տան:
Այսօր այդ պահն է, կամ գուցէ այդ պահուան սկիզբը:
Իրանը նոր չէ, որ Հայաստանի կողքին է ու յուսալի է, որ երկու երկիներուն միջեւ առկայ յարաբերութիւնները նոր թափ ստանան Իրանի ձեռներէց նախագահին այս այցին առընթեր:
