24.09c
Երեվան
երք, հնս 02
Հայկական ապրանքներու նկատմամբ Ռուսիոյ սահմանափակումներու լոյսի ներքոյ վարչապետ Նիկոլ Փաշինեանը յայտնած է, որ վարդերու եւ բանջարեղէնի առաջին խմբաքանակն արդէն դուրս եկած է դէպի Եւրոպա եւ այլ երկիրներ:
«Տեղ կը հասնեն, նոր կ՚ասեմ, թէ որ երկրներ, ոչ մի ապրանք չի մնալու»,- յունիս 2-ին Գեղարքունիքի մէջ նախընտրական քարոզարշաւի ժամանակ ըսած է Փաշինեանը։
Նախօրէին տնտեսութեան նախարար Գէորգ Պապոյեանը յայտնած էր, որ Հայաստանը արտահանում պիտի իրականացնէ դէպի Յունաստան, Գերմանիա եւ այլ երկիրներ։ Նախարարի խօսքով՝ տնտեսութեան նախարարութիւնը արտահանման աջակցութեան ծրագիրներ ներկայացուցած է դէպի Եւրոպական Միութիւն, Մերձաւոր Արեւելք՝ փոխադրային ծախսերու փոխհատուցում, մաքսատուրքի փոխհատուցում։
«Եւրոպական Միութեան արտահանումը կրկնապատկուել է, նպատակ ունենք քառապատկենք, հնգապատկենք մինչեւ տարեվերջ»,-ըսած է Պապոյեանը։
Հայաստանի խորհրդարանական ընտրութիւններէն առաջ Ռուսիան կոշտացուցած է իր հռետորաբանութիւնը Հայաստանի նկատմամբ։
Ռուսիոյ նախագահ Վլատիմիր Փութին աւելի վաղ յայտարարած էր, որ Հայաստանը ստիպուած պիտի ըլլայ ընտրութիւն կատարել Եւրոմիութեան եւ ԵԱՏՄ-ի միջեւ։ Վարչապետ Նիկոլ Փաշինեանը պնդած է, որ ԵԱՏՄ-էն դուրս գալն այժմ Երեւանի օրակարգի վրայ չէ։
Այս յայտարարութիւններու լոյսի ներքոյ Ռուսիա կը շարունակէ սահմանափակել հայկական ապրանքներու մուտքն իր շուկայ։ Յունիս 2-էն արգիլուած է հայկական ձկնամթերքի ներմուծումը՝ բացառութեամբ երկու ընկերութեան։ Մայիս 30-էն «Ռոսպոտրեբնադզոր»-ի որոշմամբ սահմանափակուած է պտուղ-բանջարեղէնի ներմուծումը։ Նախապէս նմանատիպ արգելքներ կիրառուած էին ծաղիկներու, «Ջերմուկ» հանքային ջուրի, ինչպէս նաեւ քանի մը տեղական արտադրողներու քոնեաքի եւ գինիի նկատմամբ։
