11.09c
Երեվան
երք, մրտ 17
Ծոցի արաբական երկիրները ԱՄՆ-էն չեն խնդրած պատերազմ սկսիլ Իրանի դէմ, սակայն անոնցմէ շատներ հիմա կը յորդորեն կանգ չառնել եւ թոյլ չտալ, որ Իրանը շարունակէ սպառնալ Ծոցի նաւթային կենսական ուղիին եւ անկէ կախեալ տնտեսութիւններուն։ Այս մասին Reuters-ին յայտնած են Ծոցի երկիրներու երեք աղբիւրներ։
Միեւնոյն ժամանակ, այս աղբիւրները եւ հինգ արեւմտեան եւ արաբ դիւանագէտներ նշած են, որ Ուաշինկթըն ճնշում կը գործադրէ Ծոցի երկիրներու վրայ՝ միանալու ԱՄՆ-իսրայէլական պատերազմին։ Ըստ անոնցմէ երեքի, նախագահ Տանըլտ Թրամփ ուզած է ցոյց տալ տարածաշրջանային աջակցութիւնը ռազմարշաւին՝ ատոր միջազգային օրինականութիւնը բարձրացնելու եւ երկրէն ներս աջակցութիւն ստանալու համար։
«Ծոցի տարածաշրջանին մէջ տարածուած է այն զգացողութիւնը, որ Իրանը հատած է բոլոր կարմիր գիծերը Ծոցի իւրաքանչիւր երկրի հետ»,– ըսած է Սէուտական Արաբիոյ մէջ գործող Ծոցի հետազօտական կեդրոնի նախագահ Ապտուլազիզ Սակերը, որ ծանօթ է կառավարութեան տեսակէտներուն։
«Սկիզբը մենք կը պաշտպանէինք անոնց եւ պատերազմին դէմ էինք, բայց երբ անոնք սկսան հարուածներ ուղղել մեր դէմ, դարձան թշնամի։ Անոնց դասակարգելու այլ ձեւ պարզապէս չկայ»,– նշած է ան։
