-1.91c
Երեվան
ուրբ, նմբ 08
Թուրքիոյ նախագահ Ռեճէպ Թայէպ Էրտողանը յայտարարած է, որ իր «Արդարութիւն եւ զարգացում» կուսակցութիւնը չէ կրցած հասնիլ ցանկալի արդիւնքներու տեղական ինքնակառավարման մարմիններու ընտրութիւններուն:
Ընդդիմադիր Ժողովրդահանրապետական կուսակցութիւնը 20 տարուան մէջ առաջին անգամ յաղթած է իշխող կուսակցութեան։
«Ցաւօք, մենք չկրցանք հասնիլ այն արդիւնքին, որ կ՚ուզէինք եւ որու յոյսն ունէինք քաղաքային ընտրութիւններուն», -ըսած է Էրտողան Անգարայի մէջ իր կողմնակիցներուն, մէջբերած է Anadolu-ն:
Էրտողան կարծիք յայտնած է, որ ժողովուրդը ընտրութեան միջոցով կը փոխանցէ իր դիրքորոշումը քաղաքական գործիչներուն, եւ անկախ քուէարկութեան արդիւնքներէն՝ յաղթող դարձած է թրքական ժողովրդավարութիւնը։ Ան նշած է, որ ընտրութիւնները աւարտած են առանց լուրջ միջադէպերու։ Էրտողանի խօսքով՝ այս արդիւնքները «ոչ թէ վերջն էին, այլ շրջադարձի սկիզբը»։
Երկրի ղեկավարը խոստացած է, որ յառաջիկայ 4-5 տարիներուն իր կուսակցութիւնը պիտի կեդրոնանայ երկրի հրատապ խնդիրներու վրայ։
Քուէաթերթիկներու 93%-ի հաշուարկէն ետք Ժողովրդահանրապետական կուսակցութիւնը քաղաքային ընտրութիւններուն ստացած է ձայներու 37,4%-ը, իշխող «Արդարութիւն եւ զարգացում» կուսակցութիւնը՝ 35,7%: Ընտրութիւններու արդիւնքներէն ետք երեք խոշոր քաղաքներու՝ Անգարայի, Իսթանպուլի եւ Իզմիրի ընդդիմադիր քաղաքապետերը պիտի պահպանեն իրենց պաշտօնները։
