Ռուսական ուժեր յաջողութիւններ գրանցած են Տոնպասի մէջ. Փենթակոնէն արձագանգ

Ռուսական ուժեր յաջողութիւններ գրանցած են Տոնպասի մէջ. Փենթակոնէն արձագանգ

Տոնպասի մէջ Ռուսիոյ վերջին ձեռքբերումները կապուած են աւելի փոքր տարածքով ռուսական զօրքերու յառաջխաղացման, ինչպէս նաեւ տարածքի աշխարհագրութեան հետ: Այս յայտնած է Փենթակոնի խօսնակ Ճոն Քիրպին:

Ան յիշեցուցած է, որ Քիեւի վրայ ռուսական զօրքերու յարձակումը աւարտած է անյաջողութեամբ` նիւթատեխնիկական խնդիրներու պատճառով, ինչի արդիւնքով ռուսական տեխնիկայի շարասիւնը տասնեակ քիլոմեթրերով երկարած է:

«Տոնպասը այլ տարածք է: Այն աւելի հարթ է, աւելի բաց, կան շատ դաշտեր, քաղաքները եւ գիւղերը փոքր են: Եւ քանի որ այն կը գտնուի Արեւելեան Ուքրանիոյ մէջ, այն աւելի մօտ է Ռուսաստանի սահմաններուն եւ անոնց մատակարարման եւ աղբիւրներու շղթային», շեշտած է Քիրպին:

ԱՄՆ Պաշտպանութեան նախարարութեան ներկայացուցիչը յաւելած է, որ ռուսական յառաջխաղացումը Տոնպասի մէջ կը սահմանափակուի անով, որ զօրքերը չեն ցանկար պոկուիլ մատակարարման շղթայէն:

«Անոր մէկ մասը կապուած է աշխարհագրութեան հետ` Ռուսիոյ մօտ ըլլալը եւ տարածքի առանձնայատկութիւնները, բայց եւս մէկ պատճառ, թէ ինչու անոնք աստիճանաբար յառաջ կ'երթան, ի հարկէ, ոչ միայն ուքրանական դիմադրութեան պատճառով, այլ նաեւ այն պատճառով, որ իրենք չեն փափաքիր չափազանց հեռու տեղափոխուիլ իրենց մատակարարման աղբիւրներէն», նշած է ան:

Միեւնոյն ժամանակ, Փենթակոնը չի կարծեր, որ Ռուսիան յաջողած է լիովին յաղթահարել յարձակման հետ կապուած խնդիրները` կառավարում, ցամաքային եւ օդային գործողութիւններու համարկման ապահովում: