Ռուս խաղաղապահներու վերաբերեալ գրաւոր մտահոգութիւններ 2021-ին փոխանցուած են ՌԴ ղեկավարութեան. ՀՀ ԱԳՆ

Ռուս խաղաղապահներու վերաբերեալ գրաւոր մտահոգութիւններ 2021-ին փոխանցուած են ՌԴ ղեկավարութեան. ՀՀ ԱԳՆ

Ռուսական խաղաղապահ զօրախումբի գործունէութեան արդիւնաւէտութեան բարձրացման անհրաժեշտութեան եւ հետագային հնարաւոր խնդիրներու առաջացման վերաբերեալ հայկական կողմի մտահոգութիւնները 2021 թուականի փետրուարին գրաւոր  փոխանցուած են Ռուսիոյ Դաշնութեան բարձրագոյն ղեկավարութեան, ըսած է  ՀՀ ԱԳՆ մամուլի քարտուղար Վահան Յունանեանը՝ պատասխանելով ԶԼՄ-ներու հարցին․

«Տեղեկացնում ենք, որ ռուսական խաղաղապահ զօրախմբի գործունէութեան արդիւնաւէտութեան բարձրացման անհրաժեշտութեան եւ հետագայում հնարաւոր խնդիրների առաջացման վերաբերեալ հայկական կողմի մտահոգութիւնները, ի թիւս այլ դէպքերի, դեռեւս 2021 թուականի փետրուարին գրաւոր կերպով փոխանցուել են ՌԴ բարձրագոյն ղեկավարութեանը»,- գրուած է ԱԳՆ խօսնակի դիմատետրեան էջին։

Ինչպէս «Արեւելք» նախապէս տեծեկացուց էր, Ռուսիոյ Դաշնութեան արտաքին գործոց նախարար Սերկէյ Լաւրով` անդրադառնալով ՀՀ վարչապետ Նիկոլ Փաշինեանի յայտարարութեան, ըսած էր՝

«Մենք չենք տեսած յստակ առաջարկներ, որոնք ՀՀ վարչապետը կ'ուզէ քննարկման դնել Լեռնային Ղարաբաղի մէջ ռուսական խաղաղապահ գործողութեան վերաբերեալ։ Ես չեմ կրնար գուշակութիւն ընել»:

Ան նշած է, որ պայմանաւորուածութիւններ ձեռք բերած կողմերէն իւրաքանչիւրը` Ռուսաստանի, Ատրպէյճանի նախագահները եւ Հայաստանի վարչապետը, իրաւասու են լրացուցիչ նախաձեռնութիւններ առաջարկելու:

4 Օգոստոսին, Փաշինեան յայտարարած էր, որ անհրաժեշտ է Լեռնային Ղարաբաղի մէջ խաղաղապահ գործողութեան մանրամասները ճշգրտել։ Ան նշած է, որ Հայաստանի ու Ռուսիոյ ստորագրութիւնները բաւարար են ԼՂ-ի մէջ խաղաղապահներու մանթատն ամբողջութեամբ իրագործելու համար, իսկ եթէ ոչ, ուրեմն անհրաժեշտ է միջոցներ ձեռնարկել այդ մանթատը միջազգայնօրէն հաստատելու կամ խաղաղապահները աւելի լայն միջազգային մանթատով օժտելու ուղղութեամբ։