17.09c
Երեվան
կրկ, մյս 12
Երեւանի աւագանիի ընտրութիւններուն «Քաղաքացիական պայմանագիր» կուսակցութեան նախընտրական շտապի պետ Արմէն Փամբուխչեան հերքած է երթերուն մասնակցելու նպատակով գումար բաժնելու մասին «Ականատես» դիտորդական առաքելութեան հրապարակումը։ Փամբուխչեանի յայտարարութիւնն ամբողջութեամբ կը ներկայացնենք ստորեւ․
«Այսօր առաւօտից տարածուող «ՔՊ-ն իր երթերին մասնակցելու համար գումար է բաժանում» վերտառութեամբ յօդուածը բացարձակ զրպարտութիւն է։
«Քաղաքացիական պայմանագիր» կուսակցութիւնն իր գործունէութեան ընթացքում միշտ մերժել եւ շարունակում է մերժել գումարի դիմաց քաղաքացիներին հանրահաւաքներին, երթերին ներգրաւելու արատաւոր երեւոյթը։
Այսօր առաւօտեան յօդուածը լոյս տեսնելուց անմիջապէս յետոյ Կուսակցութեան նախընտրական շտաբը կապ է հաստատել առանց բացառութեան բոլոր ենթաշտաբների պետերի հետ։ Կարող ենք փաստել, որ կուսակցութեան ո՛չ կեդրոնական շտաբը, ո՛չ ենթաշտաբները որեւէ առնչութիւն չունեն յօդուածում նկարագրուող պրոցեսների (գործընթացներ) հետ։
«Քաղաքացիական պայմանագիր» կուսակցութիւնն իր քարոզարշաւն իրականացնում է բացառապէս օրէնքով սահմանուած կարգով, օգտուելով միայն վճարովի գովազդային եւ այլ այնպիսի ծառայութիւններից, որոնք արգելուած չեն օրէնքով եւ չեն հակասում մեր արժէքներին։ Որպէս օրինակ՝ գովազդային գործակալութիւնների հետ սահմանուած կարգով համագործակցում ենք՝ պաստառներ փակցնելու, թռուցիկներ տարածելու, լետ էկրանների (պաստառ) վրայ գովազդային հոլովակներ տեղադրելու եւ նման այլ հարցերով։
Իրաւապահ մարմիններին կոչ ենք անում անյապաղ ստուգել հրապարակուած յօդուածում առկայ տեղեկատուութեան իսկութիւնը եւ դրանում քրէաիրաւական գնահատականի արժանի արարքի առկայութիւնը։
Աներկբայօրէն պէտք է պարզել այս գործողութիւնը կատարողի կամ այս պատմութիւնը բեմադրողի ինքնութիւնը։
Հարկ ենք համարում շեշտել, որ «Քաղաքացիական պայմանագիր» կուսակցութիւնը միակն է, որ քարոզարշաւի առաջին օրուանից ցայսօր ամէն օր հրապարակել է իր քարոզարշաւի անցկացման օրը, ժամը եւ վայրը՝ ամբողջ պրոցեսը մաքսիմալ (առաւելագոյն) թափանցիկ դարձնելով լրատուամիջոցների համար։
Յատուկ ուշադրութիւն ենք հրաւիրում այն փաստին, որ «Ականատես» դիտորդական առաքելութիւնն արդէն երկրորդ անգամ է նախընտրական փուլում զրպարտական բնոյթի նիւթ տեղադրում եւ թիրախաւորում «Քաղաքացիական պայմանագիր» կուսակցութեանը։ Նախորդ անգամ առաքելութեան անդամները որպէս վարչական լիազօրութիւնների չարաշահում էին ներկայացրել մեր՝ արձակուրդում գտնուող աւագանու թեկնածուներից մէկի՝ քարոզչական բնոյթի ֆեյսբուքեան (դիմատետրեան) յետնանկարի տեղադրումը։
Բոլոր հետաքրքրուած լրագրողներին, ՀԿ (Հասարակական կազմակերպութեան) եւ դիտորդական առաքելութիւնների անդամներին եւ, ի հարկէ, քաղաքացիներին հրաւիրում ենք օրուայ ցանկացած ժամի եւ ցանկացած վայրում իրականացուող մեր քարոզարշաւներին՝ սեփական աչքերով տեսնելու թէ՛ մեր քարոզարշաւը, թէ՛ մեր թիմակիցների մոտիվացիան (ոգեւորութիւն) , որը ի տարբերութիւն շատերի փողը չէ»։
