image
Հրատապ լուրեր:

ՆԱԹՕ-ն կ՚աջակցի Հայաստանի ինքնիշխանութեան ու տարածքային ամբողջականութեան․ Սթոլթընպերկ

ՆԱԹՕ-ն կ՚աջակցի Հայաստանի ինքնիշխանութեան ու տարածքային ամբողջականութեան․ Սթոլթընպերկ

ՆԱԹՕ-ն կ՚աջակցի Հայաստանի ինքնիշխանութեանն ու տարածքային ամբողջականութեան։ Այդ մասին մարտ 19-ին Երեւանի մէջ վարչապետ Նիկոլ Փաշինեանի հետ համատեղ ասուլիսին յայտարարած է ՆԱԹՕ-ի ընդհանուր քարտուղար Ենս Սթոլթընպերկը։

«Յոյս ունիմ, որ կը շարունակենք զօրացնել մեր գործընկերութիւնը՝ միասին աշխատելով Հարաւային Կովկասի մէջ խաղաղութեան, կայունութեան եւ բարեկեցութեան համար»,-ըսած է ան։

«Բարձր կը գնահատեմ ձեր անձնական առաջնորդութիւնն առ այն, որ դուք յստակ կ՚արտայայտուիք խաղաղութեան օգտին եւ հաւատարիմ էք ժողովրդավարութեան արժէքներուն»,-ըսած է Սթոլթընպերկը, աւելցնելով, որ «Հայաստանը վաղուց ՆԱԹՕ-ի գործընկեր է, դրական կը գնահատեմ ձեր ներդրումը ՆԱԹՕ-ի առաքելութիւններուն ու գործողութիւններուն»:

Սթոլթընպերկի կարծիքով՝ տարիներու հակամարտութենէն ետք Հայաստանն ու Ատրպէյճանը այսօր հնարաւորութիւն ունին տեւական խաղաղության հասնելու։

«Այսօրուն հանդիպման քննարկեցինք Հարաւային Կովկասի մէջ կայունութեան կարեւորութիւնը, սա կարեւոր է Եւրոաթլանթեան անվտանգութեան համար։ Այսօր Հայաստանն ու Ատրպէյճանը հնարաւորութիւն ունին տեւական խաղաղութեան հասնելու տարիներու հակամարտութենէ ետք։ Ահա թէ ինչու ես երկու երկիրներուն կոչ կ՚ընեմ համաձայնութեան հասնելու, որ ուղի կը հարթէ յարաբերութիւններու կարգաւորման համար»,- նշած է ՆԱԹՕ-ի Ընդհանուր քարտուղարը։

Ենս Սթոլթընպերկը Երեւանի մէջ խօսած է նաեւ ուքրանական պատերազմի մասին՝ ողջունելով Նիկոլ Փաշինեանի համերաշխութիւնը Ուքանիոյ հետ։

«Բոլոր գործընկերներուն կոչ կ՚ընեմ ընելու իրենցմէ կախուած ամէն ինչ, որ Փութինը չյաղթէ յարձակողական իր պատերազմին մէջ։ Մարտադաշտին մէջ իրավիճակը կը շարունակէ մնալ ծանր, այս պատճառով է որ պէտք է աւելցնել եւ ոչ թէ նուազեցնել աջակցութիւնը։ Եթէ Փութինը Ուքրանիոյ մէջ յաջողութեան հասնի, իրական վտանգ կայ, որ անոր յարձակումը այնտեղ կանգ չառնէ»,-յայտարարած է ան։

Սթոլթընպերկը ուքրանական պատերազմի հետ կապուած նմանատիպ ուղերձ յղած էր նաեւ Պաքուէն, մարտ 17-ին։

Մինչ Հայաստան ժամանելը, ՆԱԹՕ-ի Ընդհանուր քարտուղարն այցելած էր Ատրպէյճան եւ Վրաստան։