«Մեզի պէտք է իսկական խաղաղութիւն, որուն մէջ հայու արժանապատւութիւնը վիրաւորուած պիտի չըլլայ».Պոլսահայ երգչուհի՝ Սիպիլ

 «Մեզի  պէտք է իսկական  խաղաղութիւն, որուն մէջ  հայու արժանապատւութիւնը վիրաւորուած  պիտի  չըլլայ».Պոլսահայ երգչուհի՝ Սիպիլ

«Արեւելք»ի հացումներուն կը պատասխանէ պոլսահայ երգչուհի՝ Սիպիլ։

- Ի՞նչ է ձեր կարծիքը հայ-թրքական յարաբերութիւններուն մասին:

Եթէ այս հարցումը պատերազմէն (Նկատի ունի Արցախեան 44-օրեայ պատերազմը խմբ.՝«Արեւելք») առաջ հարցնէիք, աւելի հանգիստ ձեւով կը պատասխանէի: Բայց հիմա գիտնալով հազարաւոր զոհերու ու վիրաւորներու մասին, սիրտս կը ցաւի ու կը մտահոգուիմ թէ ինչ կրնայ ըլլալ այս յարաբերութիւններուն արդիւնքը: Երանի թէ պատերազմը ըլլալէն առաջ քաղաքական գործիչները լուծում կարենային գտնել առանց զոհեր տալու եւ առանց ընտանիքները զաւակազուրկ ընելու: Ժամանակը ետ վերադարձնելու կարելիութիւնը չունինք: Հիմա դեռ բանակցութիւններու ժամանակ նոյնիսկ զոհեր կ'ունենանք: Ես քաղաքական գործիչ չեմ, ես իմ մարդկային տեսանկիւնէն կը ջանամ մօտենալ այս ամէն ինչին: Բոլորիս նպատակը մէկ է: ԽԱՂԱՂՈՒԹԻՒՆ, ԽԱՂԱՂՈՒԹԻՒՆ, ԽԱՂԱՂՈՒԹԻՒՆ: Բայց այս խաղաղութիւնը ոչ թէ մակերեսային, այլ իսկական պէտք է ըլլայ, եւ երբեք պէտք չէ վնաս հասցնէ Հայու արժանապատուութեան: 

-Վերջերս  ձեր արուեստով հետաքրքրուող ծանօթներու ըսած էիք, որ ձեզի համար շատ մեծ կարեւորութիւն ունի «Աւրորայի աղօթքը» երգն ու այդ երգին տարածումը:

«Աւրորայի Աղօթքը» երգս աղօթք է Տիրամօր: Աշխարհի պատերազմներու պատճառով որբացած երեխաներու ձօնուած երգ է: Այս երգը մինչեւ հիմա իմ երգած երգերէս կը տարբերի իր խորհուրդով ու նպատակով: Կրնամ ըսել, թէ իմ ամէնէն մտածուած եւ անոր վրայ ամէնէն շատ աշխատանք տարուած երգն է, տեսահոլովակի նկարահանման համար ամիսներ մտածած ու անքուն գիշերներ անցուցած ենք:

Երգի հեղինակ՝ Յասմիկ Հախվերտեանը մօտաւորապէս 4 տարի առաջ ստեղծած էր այս երգը, նկատի ունենալով աշխարհի պատերազմները: Յատկապէս այդ շրջանին տեղի կ'ունենար Սուրիոյ պատերազմը: Ցաւօք սրտի յետոյ տեղի ունեցաւ Արցախեան պատերազմը:

Պատերազմի վերջին օրերուն կը գտնուէի Հայաստան: Ինչպէս բոլորին հոգեվիճակը, իմս ալ շատ վատ էր ու երգելու ի վիճակի չէի: Բայց Յասմիկ ստիպեց, որ պէտք է ճիշդ այս հոգեվիճակով երգեմ եւ ես երգը արձանագրեցի, մտածելով որբացած երեխաներու եւ որդեկորոյս մայրերու մասին: Տեսահոլովակի նկարահանումը կատարեց յայտնի բեմադրիչ՝ Հրանդ Մովսիսեան: Լուրջ աշխատանք տարուեցաւ նկարահաանման ժամանակ, քանի որ մենք պիտի փորձէինք այս երգին ու նաեւ տեսահոլովակին միջոցաւ պատեարզմներու դաժանութիւնը ներկայացնելու։Հրանդ Մովսիսեան նկարահանումի ընթացքին 3,5 րոպէի մէջ փորձեց պատմութիւնը փոխանցել հանդիսատեսին: Յատկապէս անձիս համար շատ մեծ նշանակութիւն ունէր պատերազմի ձօնուած երգի մը համար ձայն տալ, քանի որ ծնած եմ ու կ'ապրիմ Պոլիս: Ուզեցի երգի միջոցով իմ սրտի խօսքը ըսել ու տարածել, նաեւ նպատակս է իմ երգի միջոցով ամբողջ աշխարհին այս պատգամը հասցնել: 

Յատկապէս այս շրջաններուն բոլորս կարիքը ունինք խաղաղութեան, քանի որ աշխարհի մէջ խաղաղութենէ լաւ բան չկայ: