-6.91c
Երեվան
կրկ, դկտ 21
Յունիսի 5-ին, օրհնութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի Մայր Աթոռ Սուրբ Էջմիածնում մեկնարկեց միաբանական համագումարը, որին մասնակցում են Հայաստանի եւ Սփիւռքի թեմերից միաբան վարդապետները եւ աբեղաները: Համագումարին մասնակցում են նաեւ ներկայացուցիչներ Մեծի Տանն Կիլիկիոյ Կաթողիկոսութիւնից, Երուսաղէմի եւ Կոստանդնուպոլսի Հայոց Պատրիարքութիւններից:
Միաբանական համագումարը սկսուեց Տէրունական աղօթքով, որից յետոյ մասնակիցներին ողջունեց համագումարի ատենապետ Մայր Աթոռ Սուրբ Էջմիածնի Քարոզչական բաժնի տնօրէն Հոգեշնորհ Տ. Գարեգին վարդապետ Համբարձումեանը:
Հայր Սուրբն իր ուրախութիւնը յայտնելով համագումարի անցկացման առիթով` միաբաններին փոխանցեց նաեւ Ամենայն Հայոց Կաթողիկոսի սերն ու օրհնութիւնը: Հայր Գարեգինն ընդգծեց, որ այս համագումարը լաւագոյն հնարաւորութիւն է միասնաբար ու միատեղ քննարկելու Հայ Եկեղեցու առջեւ ծառացած մարտահրաւէրները եւ ուղիներ գտնելու դրանց յաղթահարման գործում:
.jpg)
Բացման խօսքին յաջորդեց համագումարի օրակարգի քննարկումն ու հաստատումը:
Համագումարի առաջին նիստը վարում էր Քրէակատարողական հիմնարկների հոգեւոր տեսուչ Հոգեշնորհ Տ. Ռուբեն վարդապետ Զարգարեանը:
«Հայ Առաքելական Եկեղեցու քարոզչական ու հոգեւոր-կրթական առաքելութիւնը ժամանակակից աշխարհում. տեսլականներ եւ մարտահրաւէրներ» թեմայով զեկոյց ներկայացրեց Մայր Աթոռի Քրիստոնէական դաստիարակութեան կենտրոնի տնօրէն Հոգեշնորհ Տ. Զաքարիայ ծայրագոյն վարդապետ Բաղումեանը: Հայր Սուրբն ի մասնաւորի անդրադարձաւ երիտասարդների հոգեւոր դաստիարակութեան կարեւորութեանը, նրանց բարոյական եւ ազգային կերտուածքի ձեւաւորմանը, հոգեւոր անվտանգութեան ապահովմանը, աղանդաւորական շարժումների դէմ պայքարին, ինչպէս նաեւ հոգեւոր ուսումնական հաստատութիւններում կրթութեան արդիւնաւէտութեան բարձրացմանը:
Զեկոյցից յետոյ տեղի ունեցան խմբային քննարկումներ, կարծիքների փոխանակումներ, ելոյթներ եւ ամփոփումներ, որոնք առնչւում էին Հայ Առաքելական Սուրբ Եկեղեցու քարոզչական գործունէութեան առաւել արդիւնաւէտ իրականացմանն ուղղուած քայլերին:
Վեցօրեայ ժողովի ընթացքում Մայր Աթոռ Սուրբ Էջմիածնի միաբանները կը քննարկեն նաեւ Եկեղեցու եւ հայ ժողովրդի առջեւ ծառացած զանազան մարտահրաւէրներ, կը լսեն տարբեր զեկոյցնէր: Յունիսի 6-ին համագումարի մասնակից միաբանները կ'այցելեն Ծիծեռնակաբերդի յուշահամալիր եւ «Եռաբլուր» զինուորական պանթէոն: Յունիսի 7-8 հովուական առաքելութեամբ կը մեկնեն Տաւուշի եւ Գեղարքունեաց թեմերի տարբեր համայնքներ, այցելութիւններ կը կատարեն մասնաւորապէս արցախեան 44-օրեայ պատերազմում զոհուած, վիրաւոր եւ անյայտ կորած զինուորների ու Արցախից տեղահանուած ընտանիքներին:
