5.09c
Երեվան
երկ, ապր 14
Իսրայէլն ու Թուրքիան չեն յաջողած համաձայնութեան հասնիլ Սուրիոյ մէջ հակամարտութիւնը կանխելու ուղիներու շուրջ բանակցութիւններու առաջին փուլին, որ կայացած է Ատրպէյճանի մէջ։ «Արմէնփրէս»-ի հաղորդմամբ՝ այս մասին յայտնած է Israel Radar-ը:
Այս մասին հաղորդած է նաեւ Իսրայէլի պետական Kan News հեռուստառատիոընկերութիւնը։ Նշուած է, որ բանակցութիւնները, որոնց ընթացքին իսրայէլեան եւ թրքական կողմերը կը փորձեն պայմանաւորուիլ Սուրիոյ մէջ թրքական եւ իսրայէլեան կողմերու միջեւ հակամարտութիւնը կանխելու մեխանիզմի ստեղծման շուրջ, պէտք է շարունակուին հրէական Փասեքի տօնի աւարտէն ետք, որ այս տարի կը նշուի ապրիլ 12-էն 19-ը:
Լրատուամիջոցը նաեւ նշած է, որ Թուրքիան Ատրպէյճան մեկնող Իսրայէլի բանակցողներու ինքնաթիռին թոյլ չէ տուած անցնիլ իր երկրի օդային տարածքով, որու պատճառով այն ստիպուած եղած է թռիլ Սեւ ծովու վրայով։
Ապրիլ 10-ին Իսրայէլի վարչապետ Բենիամին Նաթանիահուի գրասենեակը հաստատած է, որ Ատրպէյճանի մէջ Թուրքիոյ ներկայացուցիչներու հետ ապրիլ 9-ին ուղիղ բանակցութիւններ տեղի ունեցած են։
Նաթանիահուի գրասենեակը շնորհակալութիւն յայտնած է Ատրպէյճանի նախագահ Իլհամ Ալիեւին «կարեւոր բանակցութիւնները հիւրընկալելու համար» եւ ըսած, որ հանդիպման ընթացքին «իւրաքանչիւր կողմ ներկայացուցած է իր շահերը տարածաշրջանին մէջ եւ համաձայնած է շարունակել երկխօսութեան ուղին՝ անվտանգութիւնը եւ կայունութիւնը պահպանելու համար»։
Իսրայէլցի պաշտօնեայի խօսքով, որու անունը չէ նշուած, Իսրայէլը «միանշանակ հասկցուցած է, որ Սուրիոյ մէջ օտար ուժերու տեղակայման որեւէ փոփոխութիւն, մասնաւորապէս՝ Փալմիրայի (Թատմոր) տարածքին մէջ թրքական ռազմակայաններու ստեղծումը, կարմիր գիծ է»։
Պաշտօնեան աւելցուցած է, որ նման գործողութիւններու կանխումը «Դամասկոսի կառավարութեան պարտականութիւնն է: Որեւէ գործողութիւն, որ կը վտանգէ Իսրայէլը, կը սպառնայ (Սուրիոյ նախագահ Ահմետ) Շարըհի իշխանութեան»:
Իսրայէլի եւ Թուրքիոյ յարաբերութիւնները կտրուկ վատթարացած են Կազայի հատուածի մէջ 2023 թուականին սկսած հակամարտութեան սրման լոյսին տակ եւ աւելի լարուած են 2024 թուականի վերջը Սուրիոյ մէջ տեղի ունեցած իշխանափոխութենէն ետք:
