16.09c
Երեվան
երք, սպտ 01
ՀՅԴ Հայաստանի Գերագոյն մարմնի ներկայացուցիչ, ՀՀ ԱԺ փոխնախագահ Իշխան Սաղաթելեանը փետրուարի 22-ին ընդունել է Եւրոպական Խորհրդարանի` Հարաւային Կովկասի երկրների հետ պատուիրակութեան ղեկավար Մարինայ Կալիւրանդին եւ Եւրոպական Խորհրդարանի պատգամաւոր Եօազես Օլեկասին: Հանդիպմանը մասնակցել են ՀՅԴ անդամներ, ՀՀ ԱԺ պատգամաւորներ Արծուիկ Մինասեանը, Արթուր Խաչատրեանը, Քրիստինէ Վարդանեանը, ՀՅԴ Բիւրոյի Հայ դատի Կենտրոնական գրասենեակի յատուկ ծրագրերի պատասխանատու Գեւորգ Ղուկասեանը:
Իշխան Սաղաթելեանը ներկայացրել է ՀՅԴ դիրքորոշումները Ղարաբաղեան հիմնախնդրի շուրջ ստեղծուած իրավիճակի վերաբերեալ` նկատելով, որ հիմնախնդիրը լուծուած չէ եւ վերջնական լուծումը հնարաւոր է բացառապէս ԷԱՀԿ Մինսկի խմբի համանախագահութեան շրջանակներում:
ԱԺ փոխխօսնակն անդրադարձել է նաեւ ՀՀ ինքնիշխան տարածքի նկատմամբ Ադրբեջանի շարունակուող ոտնձգութիւններին եւ շնորհակալութիւն յայտնել տիկին Կալիւրանդին` վերջինիս 2021 թ․ փետրուարի 21-ի համատեղ յայտարարութեան ու 2022 թ․ փետրուարի 22-ի ելոյթի կապակցութեամբ: Տիկին Կալիւրանդն ընդգծել է հակամարտութեան համապարփակ կարգովորման անհրաժեշտութիւնը, ինչին պէտք է հասնել ԷԱՀԿ Մինսկի խմբի համանախագահութեան շրջանակում, հիմնուած տարածքային ամբողջականութեան, ուժի չկիրառման եւ ժողովուրդների ինքնորոշման ու իրաւահաւասարութեան սկզբունքների վրայ: Եւրոպացի գործընկերները վերահաստատել են իրենց կառուցողական եւ հաւասարակշռուած դիրքորոշումները:
ՀՅԴ ներկայացուցիչները մտահոգութիւն են յայտնել Հայաստանում արձանագրուող ժողովրդավարական հետընթացի կապակցութեամբ` նկատելով, որ իշխանութիւնները հետեւողական ապատեղեկատուութեամբ փորձում են մոլորեցնել եւրոպացի գործընկերներին:
Առանձնայատուկ քննարկուել է ՀՅ Դաշնակցութեան եւ Եւրոպական Խորհրդարանի սոցիալ-դեմոկրատական (S&D) քաղաքական խմբի հետ յարաբերութիւնների որակական զարգացման ուղղութեամբ յետագայ քայլերի եւ գործողութիւնների իրականացումը:
ՀՅ Դաշնակցութեանը հայկական միակ կուսակցութիւնն է, որն իբրեւ դիտորդ անդամակցում է Եւրոպայի սոցիալիստների կուսակցութեանը (PES): ՀՅԴ ներկայացուցիչներն անդրադարձել են ՀՅԴ խորհրդարանական խմբակցութեան եւ Եւրոպական Խորհրդարանի սոցիալ-դեմոկրատական քաղաքական խմբի հետ նախկինում առկայ համագործակցութեան յուշագրին:
