0.09c
Երեվան
երկ, դկտ 23
Իրանի՝ ռազմավարական հարցերով փոխնախագահ Մոհամմատ Ճավատ Զարիֆը, որ 2013-2021 թուականներուն զբաղցուցած է երկրի արտաքին գործոց նախարարի պաշտօնը եւ հանդէս եկած Միացեալ Նահանգներու հետ բանակցութիւններու օգտին, հրաժարական տուած է ընդամէնը 10 օր պաշտօնավարելէ ետք: Այս մասին Զարիֆ գրած է X-ի իր էջին։
«Ես բաւարարուած չեմ (խմբ.՝ նախարարներու նոր գրասենեակի ձեւաւորման խորհրդատուական խորհուրդի ղեկավարի) աշխատանքիս արդիւնքէն։ Այլ խնդիրներու հետ մէկտեղ սա զիս ստիպեց շարունակել իմ ուղին համալսարանէն ներս», - գրած է ան:
Խօսքը կը վերաբերի խորհրդատուական խորհուրդին, որ Զարիֆ գլխաւորած է յուլիս 5-ին Իրանի նախագահական ընտրութիւններուն Մասուտ Փեզեշքիանի յաղթանակէն անմիջապէս ետք։ Զարիֆը պատասխանատու էր նոր գրասենեակի թեկնածուներու ընտրութեան համար, որ օգոստոս 11-ին ներկայացուած էր խորհրդարանի հաստատման:
Զարիֆ՝ իսլամական հանրապետութեան բարեփոխիչներու թեւի ներկայացուցիչը, կը համարուի Միացեալ Նահանգներու հետ երկխօսութեան գլխաւոր կողմնակիցներէն մէկը, որու համար անոր կը քննադատեն իրանցի պահպանողականները։ Դիւանագէտն աշխուժ մասնակցութիւն ունեցած է 2015 թուականին Թեհրանի միջուկային ծրագրի շուրջ համաձայնագրի մշակման ու կնքման։
Ընտրութիւններուն Փեզեշքիանի յաղթանակէն ետք Զարիֆը յայտարարած էր, որ նոր նախագահը պատրաստակամ է վերականգնելու Գործողութիւններու համատեղ համապարփակ ծրագիրը։
