Հայ Առաքելական եկեղեցին այսօր կը նշէ Քառասուն սուրբ մանկանց յիշատակութեան օրը, գրած է Qahana.am-ը:
4-րդ դարու սկիզբը նահատակուած 40 վկաները Փոքր Հայքի տարբեր քաղաքներէն էին եւ զինուորական ծառայութեան մէջ էին Սեբաստիա քաղաքի կայսերական գունդին մէջ: Երբ Լիքիանոս կայսեր հրամանով Կեսարիոյ դուքս Լիւսիասը կը հարցաքննէ զինուորները`բանակին մէջ քրիստոնեաներ յայտնաբերելու նպատակով, անոնցմէ 40-ը, հաւատարիմ իրենց հաւատին, անվեհեր պատասխաններով դատաւորներու զայրոյթը կ՚առաջացնեն եւ կը բանտարկուին:
Ձմեռնային ցուրտ գիշեր մը անոնց կը նետեն Սեբաստիա քաղաքի մօտ գտնուող լիճը: 40-էն միայն մէկը չի կրնար դիմանալ տանջանքներուն: Դուրս ելլելով սառցակալած ջուրէն, ան կը փորձէ փրկութիւն գտնել լճափին կառուցուած տան մէջ, սակայն կնքելով մահկանացուն, կը զրկուի թէ´ երկրային, թէ´ երկնային կեանքէն: Լուսադէմին միւս բոլոր նահատակները կ՚երեւան լուսէ պսակներով զարդարուած: Պահապան զինուորներէն մէկը, տեսնելով այդ, կը լեցուի հաւատով եւ նետուելով լիճը, պսակակից կը դառնայ անոնց: Աստուածային հրաշքով ձմեռնային սառնամանիքին դիմակայած վկաներն առաւօտեան կը նահատակուին:
Անոնց նշխարները կ՚ամփոփուին Սեբաստիոյ մէջ, ուր եւ հետագային կը կառուցուի «Քառասուն մանկունք» 40-գմբեթանի տաճարը, որ կանգուն եղած է մինչեւ Լենկթեմուրի արշաւանքը:
40 մանկանց պատմութիւնը կը յորդորէ կեանքի բոլոր դժուարութիւններու մէջ հաւատարիմ մնալ Քրիստոսին, յաղթահարել դիւրահաճ գայթակղութիւնները` երկնային պսակին արժանանալու համար: