16.09c
Երեվան
ուրբ, նմբ 22
Օրերս ամերիկահայ (արմատներով Լիբանանէն) ազգային-քաղաքական գործիչ դոկտ. Վիգէն Յովսէփեանի հեղինակած «Աստղերու հաւատքով» հատորին ներկայացումը տեղի ունեցաւ Գիւմրիի մէջ։
Այս մասին «Արեւելք» տեղեկացաւ Շիրակի մարզային գրադարանի դիմատետրեան էջէն։
Ստորեւ՝ այդ մասին լրատւութիւնը։
Ապրիլ 30- ին, Շիրակի մարզային գրադարանի ընթերցարանէն ներս տեղի ունեցաւ հանդիպում գրող, հրապարակախօս, հասարակական գործիչ՝ Վիգէն Յովսէփեանի հետ։ Հանդիպման առանցքը հեղինակի նոր լոյս տեսած բանաստեղծութիւններու ժողովածուի շնորհանդէսն էր։
Հանդիպման գրողի հետ գրադարան եկած էին Երեւանէն գրող, լրագրող, հեռուստամեկնաբան Սագօ Արեանը, «Սիվիլնէթ»ի տնօրէն, գլխաւոր խմբագիր Աբօ Պողիկեանը, Լոս Անճելըսի «Հորիզոն» հայկական հեռուստաալիքի գլխաւոր արտադրող, լրագրող Վրոյր Թադեւոսեանը: Հանդիպման կը մասնակցէին նաեւ Հայաստանի գրողներու միութեան Շիրակի մասնաճիւղի ներկայացուցիչներ՝ բաժանմունքի նախագահ Անդրանիկ Կարապետեանը, գրողներ՝ Գագիկ Սարոյեանը, Ռուպերթ Եսայեանը, Գիւմրիի դրամատիկական թատրոնի դերասանուհի, թատերական բաժնի դասախօս, դերասանուհի Յասմիկ Սուվարեանը, Գիւմրիի թիւ 1 աւագ դպրոցի աշակերտներ, մանկավարժներ, Գիւմրիի թիւ 1 արհեստագործական պետական ուսումնարանի խումբ մը ուսանողներ, գրադարանի աշխատակիցներ, գրքասէրներ։
Գրադարանի տնօրէն Գ. Ամիրեանը ներկայացնելով հիւրերը՝ որպէս նախաբան նշեց, որ ԱՄՆ Քալիֆորնիոյ հասարակական-քաղաքական կեանքի մէջ կարեւոր հեղինակութիւն ունեցող գործիչ, Դոկտոր Վիգէն Յովսէփեանի «Աստղերու հաւատքով» բանաստեղծութիւններու ժողովածուի մէջ կը զգացուի արեւմտահայ բանաստեղծութեան ոգին, որ այսօր նոր շունչ կը ստանայ արեւմտահայերէնով ստեղծագործողներու շնորհիւ։ Գիրքի մէջ ընթերցողը կը գտնէ սիրոյ, կարօտի, բաժանման, հիասթափութեան եւ ի վերջոյ՝ անկեղծ ապրելու, նուիրուելու վեհ ու մարդկային զգացմունքներ:
Հանդիպման ընթացքին Վիգէն Յովսէփեանը ներկայացուց իր ստեղծագործական ուղին, մեկնաբանեց իր շարք մը բանաստեղծութիւններ, բացատրեց ատոնց իմաստը, գրելու շարժառիթներն ու հանգամանքները։ Հաճոյքով պատասխանեց ներկաներու հարցերուն, ընթացքին անձամբ ընթերցելով իր գրած բանաստեղծութիւններէն։
Հարց ու պատասխանի միջոցով հանդիպման մասնակիցները հաղորդակից դարձան գրողի ներքին որոնումներուն ու ատոնց մղող զգացմունքներուն։ Դերասանուհի Յասմիկ Սուվարեանը, թիւ 1 աւագ դպրոցի աշակերտները կարդացին գրողի բանաստեղծութիւններէն մի քանին։ Ընթացքին հեռուստատեսային պաստառին ցուցադրուած տեսահոլովակով հեղինակը ներկայացաւ իր բանաստեղծութիւններու ընթերցմամբ: Հանդիպման աւարտին հեղինակը ներկաներուն նուիրեց իր մակագրութեամբ «Աստղերու հաւատքով» ժողովածուէն՝ թողնելով անոնց մօտ իր զգացմուններու ու մտորումներու խոր կնիքը։
Ամփոփելով ջերմ ու անկաշկանդ մթնոլորտի մէջ ընթացող Դոկտոր Վիգէն Յովսէփեանի հետ հանդիպումը՝ գրադարանի տնօրէն Գ. Ամիրեանը, յայտնեց մասնակիցներուն իր շնորհակալութիւնը՝ կարեւորելով արեւմտահայերէնը պահելու, փայփայելու եւ խօսելու այսօրուան հրամայականը:
