7.09c
Երեվան
երկ, մրտ 10
Ֆրանսան, Գերմանիան, Իտալիան եւ Մեծ Բրիտանիան աջակցած են Կազայի հատուածի վերականգնման արաբական ծրագիրին։ Այդ մասին յայտնած է Իտալիոյ արտաքին գործոց նախարարութիւնը։
Եգիպտոսի մայրաքաղաք Գահիրէի մէջ տեղի ունեցած է Արաբական պետութիւններու լիկայի արտակարգ գագաթնաժողովը Պաղեստինի հարցով։ Մասնակիցները հաւանութիւն տուած են Կազայի հատուածի վերականգնման համար Եգիպտոսի մշակած ծրագիրին, որ կ'ենթադրէ պաղեստինցի ժողովուրդի ներկայութեան պահպանում իրենց հողերուն վրայ։ Ծրագիրը բաղկացած է երեք փուլէ, առաջինը՝ իրենց տուները կորսնցուցած պաղեստինցիներուն ժամանակաւոր կացարաններ տրամադրելն է։
«Մենք՝ Ֆրանսայի, Գերմանիոյ, Իտալիոյ եւ Մեծ Բրիտանիոյ արտաքին գործոց նախարարներս, կ'ողջունենք Կազայի վերականգնման ծրագիրի արաբական նախաձեռնութիւնը: Ծրագիրը կը նախանշէ Կազայի վերականգնման իրատեսական ուղին եւ կը խոստանայ, որ իրագործուի պաղեստինցիներու աղետալի կենսապայմաններու արագ եւ կայուն բարելաւում»,- ըսուած է յայտարարութեան մէջ:
Նախարարները նշած են, որ վերակառուցման եւ վերականգնման ջանքերը պէտք է խարսխուած ըլլան ամուր քաղաքական եւ անվտանգութեան հիմքի վրայ, որ ընդունելի է ինչպէս իսրայէլացիներուն, այնպէս ալ պաղեստինցիներուն համար՝ անով իսկ երաշխաւորելով երկարաժամկէտ խաղաղութիւն եւ անվտանգութիւն:
