21.09c
Երեվան
շբթ, ապր 26
Հայաստանի հանդէպ մեր ունեցած պայմաններէն առաջինը ԵԱՀԿ Մինսքի խումբի լուծարումն է, յետոյ՝ Հայաստանի Սահմանադրութեան փոփոխութիւնը, յայտարարած է Ատրպէյճանի նախագահ Իլհամ Ալիեւը ապրիլ 2-ին Գերմանիոյ նախագահ Ֆրանք-Վալթեր Շթայնմայերի հետ մամուլի ասուլիսին։
«Հայաստանի համար մեր պայմանները յայտնի են, նորութիւն չեն, ատոնք [պայմանները] մենք երկար ժամանակ է՝ առաջ կը տանինք։ Սակայն Հայաստանը ցայսօր ատոնց որեւէ լուրջ պատասխան չէ տուած․ անշուշտ առաջինը՝ ԵԱՀԿ Մինսքի խումբը պէտք է լուծարուի»,- յայտարարած է Ալիեւ՝ նշելով, որ խաղաղութեան պայմանագրի մէջ համաձայնեցուած 17 կէտէն բացի, Պաքուն որեւէ յաւելեալ պայման չի ներկայացներ։
Ինչ կը վերաբերի Հայաստանի Սահմանադրութեան փոփոխութեան հարցին, Ալիեւ մասնաւորապէս ըսած է.
«Երկրորդ հարցը [պահանջը] Հայաստանի Սահմանադրութեան կը վերաբերի, քանի որ ատոր մէջ Անկախութեան հռչակագրին յղում կ՚ըլլայ, եւ այն Սահմանադրութեան մաս է։ Երբ այդ երկու պահաջները կատարուին, խաղաղութեան պայմանագրի կնքման համար որեւէ խոչընդոտ չի մնար, ինչպէս ըսած ենք գնդակը Հայաստանի դաշտն է»։
Ալիեւ վստահեցուցած է, որ Հայաստանի կողմէ Պաքուի պահանջները ընդունելէն կախեալ է, թէ հայկական կողմը որքանով պատրաստ է խաղաղութեան պայմանագրի կնքման։
Ատրպէյճանի նախագահը, խօսելով խաղաղութեան պայմանագրի մասին, նշած է, թէ Հայաստանը բնագրին մէջ մինչեւ 2024-ի յունուար փորձած է յիշատակել նաեւ Լեռնային Ղարաբաղը, այնինչ ըստ Ալիեւի՝ ներկայիս այդ մասին յիշատակում չկայ։
«Այդ Հայաստանի պատրանքներէն էր։ Գոյութիւն ունի՝ Ատրպէյճանի Ղարաբաղի շրջան», – միտքն ամփոփած է Ալիեւ։
