12.09c
Երեվան
երկ, դկտ 11
Արեւմտեան Եւրոպայի հայրապետական պատուիրակ՝ Գերշ. Տ. Խաժակ արք. Պարսամեան կը շարունակէ երեւելի ճիգեր գործադրել նոր եռանդ ապահովելու մասնաւորապէս Արեւմտեան Եւրոպայի կարգ մը համայնքներու մէջ, որ երկար ատենէ ի վեր կը համարուէին լուսանցքի վրայ ապրող գաղութներ։ Այս առումով ալ ուրախալի օրեր եղած են Ամսթրատամի մէջ, ուր նշուած է տեղւոյն՝ «սուրբ հոգի» եկեղեցւոյ հիմնադրման 33-ամեակը։
Այս մասին իմացանք «Արեւելք»ին ուղարկուած թղթակցութիւնէ, որ կը ներկայացնեք ստորեւ՝
19-20 Նոյեմբերին Ամսթրտամի «Սուրբ Հոգի» եկեղեցին հիւրընկալեց Արեւմտեան Եւրոպայի հայրապետական պատուիրակ Գերշ․ Տ․ Խաժակ Արք․ Պարսամեանը, որ ժամանած էր նախագահելու տեղի եկեղեցական համայնքի հիմնադրման 33-րդ տարեդարձին նուիրուած արարողութիւնները։
Նոյեմբերի 19-ին Սրբազան Հայրը նախ հանդիպում ունեցաւ եկեղեցւոյ ծխական խորհուրդի հետ: Յընթացս ընթրիքի՝ եկեղեցւոյ հոգեւոր հովիւ Տէր Տարօն ներկայացուց նորանշանակ ծխական խորհուրդի անդամները, որմէ ետք Սրբազան Հայրը ներկաներուն խօսեցաւ ծխական խորհուրդի կարեւորութեան եւ առաքելութեան մասին:
Նոյն օրը տեղի ունեցաւ երիտասարդներու հետ հանդիպում: «Սուրբ Հոգի» եկեղեցւոյ ԱՅՈ երիտասարդաց միութիւնը դասախօսութիւն կազմակերպած էր պսակի խորհուրդի եւ յարաբերութիւններու մասին թեմայով: Խաժակ Սրբազանը հետաքրքիր կերպով, տարբեր օրինակներով ներկայացուց երիտասարդներուն ընտանիքի մոտելը, յարատեւ ու երջանիկ միութեան պահպանման գրաւականները: Հանդիպման սկիզբը ձեւաւորուեցաւ ազատ, անկեղծ ու անմիջական մթնոլորտ, որ առիթ հանդիսացաւ երիտասարդներուն անկաշկանդ յղել իրենց յուզող հարցերը եւ ստանալ սպառիչ պատասխաններ:
Նոյեմբերի 20-ին Սրբազան Հայրը Սուրբ եւ Անմահ պատարագ մատուցեց: Պատարագի աւարտին հոգեհանգստեան արարողութիւն կատարուեցաւ եկեղեցին կառուցողներու եւ պատմութեան ընթացքին իրենց ծառայութիւնը հայ համայնքին ու եկեղեցւոյ պահպանման համար մատուցած ննջեցեալ հայորդիներու համար: Ապա կատարուեցաւ մատաղօրհնութեան աւանդական արարողութիւն, որուն յաջորդեց սիրոյ սեղանը: Ներկաները իրենց սրտաբուխ նուիրատուութիւնը կատարեցին ի պահպանութիւն եւ ի պայծառութիւն «Սուրբ Հոգի» եկեղեցւոյ եւ ծխական համայնքի:
