1.09c
Երեվան
շբթ, փտր 28
Դեկտեմբերի 21-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Ֆրանսիայի Իլ դը Ֆրանս կենտրոնական շրջանի ղեկավար տիկին Վալերի Պեկրեսի գլխաւորած պատուիրակութեանը:
Վեհափառ Հայրապետը ողջունելով հիւրերին` անդրադարձաւ հայ-ֆրանսիական բարեկամական ամուր յարաբերութիւններին` գոհունակութեամբ արձանագրելով, որ Հայոց ցեղասպանութիւնից յետոյ Ֆրանսիայում ապաստանած հայորդիների նկատմամբ Ֆրանսիայի իշխանութիւնները մշտապէս ցուցաբերել են հոգածու վերաբերմունք: Այս առիթով Նորին Սրբութիւնն ընդգծեց նաեւ, որ ֆրանսահայութիւնը եւս իր մեծ նպաստն է բերում հայ-ֆրանսիական բարեկամական կապերի զօրացման գործում:
Հայոց Հայրապետն, ի դէմս տիկին Վալերի Պեկրեսի, իր երախտագիտութիւնը յայտնեց Ֆրանսիայի իշխանութիւններին եւ ժողովրդին Հայոց ցեղասպանութեան միջազգային ճաանաչման եւ Արցախի հիմնախնդրի կարգաւորմանն ուղղուած ջանքերի, ինչպէս նաեւ` 44–օրեայ պատերազմի եւ յետպատերազմեան շրջանում Հայաստանին ցուցաբերած աջակցութեան համար` կարեւոր նկատելով Ֆրանսիայի սենատի կողմից Արցախի անկախութան ճանանչման բանաձեւի ընդունումը:
Տիկին Վալերի Պեկրեսը, ներկայացնելով պատուիրակութեան անդամներին, խօսեց հայ համայնքի հետ ունեցած փոխյարաբերութիւնների, կրթութեան եւ մշակոյթի ոլորտում Հայաստանի հետ փոխգործակցութեան տեսլականների մասին` կարեւորելով երկու երկրների միջեւ ձեւաւորուած բարեկամական յարաբերութիւնների առաւել խորացումն ու ամրապնդումը:
Զրոյցի ընթացքում անդրադարձ կատարուեց Ադրբեջանի վերահսկողութեան տակ անցած տարածքներում հայկական հոգեւոր ու մշակութային ժառանգութեան պահպանութեան, պատերազմի ընթացքում վնասուած հայկական եկեղեցիների վերականգնման խնդրին` կարեւորելով միջազգային կառոյցների միջնորդական ջանքերը:
