Այցը նպատակ ունի լիովին կարգաւորել յարաբերութիւնները, ինչպէս նաեւ տնտեսական համաձայնագրեր ստորագրել եւ քաջալերել քաթարական ներդրումները Եգիպտոսի մէջ, յատկապէս ուժանիւթային ոլորտին մէջ:
Եգիպտոսի նախագահութիւնը յայտարարած է, որ Եգիպտոսի նախագահ Ապտըլ Ֆաթթահ Սիսին երկօրեայ այցով Գահիրէի մէջ ընդունած է Քաթարի էմիր Թամիմ Պըն Համատ Ալ Թանիին:
Եգիպտոսի նախագահի պաշտօնական խօսնակը յայտարարած է, որ այցը կը նախատեսուի ներառել երկու ղեկավարներուն միջեւ երկկողմանի բանակցութիւններ` անդրադառնալու երկու երկիրներուն միջեւ ընդհանուր երկկողմ յարաբերութիւններուն եւ տարբեր ոլորտներու մէջ զանոնք ընդլայնելու ուղիներուն, ինչպէս նաեւ քննարկելու ընդհանուր հետաքրքրութիւն ներկայացնող տարածաշրջանային եւ միջազգային քաղաքական հարցերու զարգացումները:
Սա Քաթարի էմիրին առաջին այցն է Գահիրէ, իսկ 7 տարուան ընթացքին առաջինը Եգիպտոս` 2015 թուականին անոր վերջին այցէն յետոյ Շարմ Ա Շէյխ` մասնակցելու խաղաղութեան քաղաքին մէջ կայացած Արաբական գագաթաժողովին:
Աղբիւրը կը նշէ, որ այցը նպատակ ունի լիովին կարգաւորել յարաբերութիւնները, ինչպէս նաեւ տնտեսական համաձայնագրեր ստորագրել եւ քաջալերել քաթարական ներդրումները Եգիպտոսի մէջ, յատկապէս ուժանիւթային ոլորտին մէջ:
Ըստ աղբիւրին, պիտի սկսի եգիպտա-քաթարական համատեղ գործարար խորհուրդը, որ բաղկացած պիտի ըլլայ գործարարներէ, որոնք պիտի աշխատին ամրապնդել տնտեսական յարաբերութիւնները եւ երկու երկիրներուն միջեւ ներդրումներու եւ առեւտուրի ոլորտները:
Անցնող ամիսներուն ընթացքին եգիպտա-քաթարական յարաբերութիւնները բազմաթիւ զարգացումներու ականատես եղած են` անցեալ տարի Սէուտական Արաբիոյ մէջ «Ալ Ուլա» գագաթաժողովի յայտարարութեան ստորագրութենէն յետոյ:
Քաթարի էմիր Թամիմ Պըն Համատ Ալ Թանիի այցը տեղի ունեցած է Սէուտական Արաբիոյ թագաժառանգ Մոհամմատ Պըն Սալմանի մի քանի օր առաջ Գահիրէ կատարած այցէն յետոյ: