14.09c
Երեվան
հնգ, հկտ 01
Իրաք- («Ալ-Ժատիտ»-Պէյրութ)- Մուսուլի ամենամեծ ջրամբարը կը դիմագրաւէ փլուզման սպառնալիք, որու հետեւանքով անոր հարաւային կողմը գտնուող ամբողջ տարածաշրջանը կրնայ ոչնչանալ: Այս մասին յայտնած է իրաքեան խորհրդարանի մէկ բանբերը, որ իր տեղեկութիւնները ստացած է ամերիկեան հետախուզական մարմիններէ: Ջրամբարի հիմքերը հաստատուն չեն, անոնք ենթարկուած են քայքայմանՙ եւ 2014-ին ISIS-ի կողմէ կարճ ժամանակով գրաւման ենթարկուելու պատճառով խախտած են անոր հիմքերը: Ամերիկեան բանակի ճարտարագէտներու պատրաստած զեկոյցին համաձայն, Մուսուլի ջրամբարը կարծուածէն շատ աւելի մեծ փլուզման վտանգ կը դիմագրաւէ:Կը նշուի, որ ջրամբարի վերակառուցման աւարտէն ետք, 1984-ին իրաքեան կառավարութիւնը ձգտած է ամրապնդել զայն, յաճախակի կերպով անոր հիմնակառոյցին մէջ ստեղծուած բացերը թրծաշաղախ լեցնելով: Ամերիկացի բանբեր մը այս մասին խօսելով, ըսած է, որ ահաբեկիչները վտարած են աշխատողները եւ գողցած ջրամբարի շուրջ եղող բոլոր սարքերը: Ըստ 30 յունուար թուակիր ամերիկեան պաշտօնական զեկոյցին, անցեալ տարի յատուկ թրծաշաղախ ներմուծելու կարելիութեան նուազումը պատճառ դարձաւ ենթակառոյցին մէջ աննախադէպ, բարձր մակարդակի բացութիւններ ստեղծելու, անընդհատ երկրաբանական մաշումի հետեւանքով: Կը նշուի նաեւ, որ Իրաքի կառավարութիւնը պայմանագիր մը կնքած է իտալական Trevi ընկերութեան հետ, ջրամբարի վերանորոգման համար, ինչպէս նաեւ Իտալիոյ վարչապետը նշած է, որ իր երկիրը պատրաստ է մինչեւ 450 զինուորներ ուղարկել ապահովելու համա ջրամբարի անվտանգութիւնը:
