5.09c
Երեվան
ուրբ, փտր 27
Շուտով ԳՈՀԱՐ սիմֆոնիկ նվագախումբն ու երգչախումբը կրկին կներկայանան հանդիսատեսին: Բեյրութի ամենաշքեղ սրահներից մեկում` «Ֆորում դը Բեյրութում» (Forum De Beyrouth) հոկտեմբերի 29-ին, 30-ին, 31-ին եւ նոյեմբերի 1-ին կհնչեն բոլոր ժամանակների հայկական սիրված երգերը, ընդ որում` համերգային ծրագիրը, ինչպես հայտնում են ԳՈՀԱՐ-ի տնօրինությունից, յուրաքանչյուր օր փոխվելու է: Երաժշտական խմբի տնօրինությունն արդեն հայտարարել է տոմսերի վաճառքի մեկնարկը: ԳՈՀԱՐ-ի բեյրության համերգների տոմսերը կարելի է ձեռք բերել Virgin Ticketing Box Office-ից, ինչպես նաեւ` պատվիրել առցանց:
ԳՈՀԱՐ-ը Հայաստանում եւ Սփյուռքում ամենահայտնի երաժշտական միավորումն է` կազմված սիմֆոնիկ նվագախմբից եւ երգչախմբից: Հիմնվել է 2000 թվականին` բեյրութահայ արվեստասեր ու հայրենասեր ընտանիքի` Խաչատուրեանների կողմից, հանձինս Յարութ Խաչատուրեանին: ԳՈՀԱՐ-ը համերգներով հանդես է եկել ոչ միայն Հայաստանում, այլեւ` սփյուռքահայ համայնքներում։ Համերգներից ստացված հասույթի մեծ մասը ծախսվում է հայ դպրոցին եւ հայ ուսուցիչին սատար կանգնելու նպատակներով։
ԳՈՀԱՐ-ի առաջին միջազգային ելույթը տեղի է ունեցել 2002 թվականին` Նիկոսիայում։ Նույն թվականին խումբը ելույթ է ունեցել նաեւ Բեյրութում եւ Երևանում։ Հատկանշական են 2005 թվականին խմբի ելույթները` Ստամբուլում, 2006 թվականին՝ Մոսկվայում։
2007 թվականին ԳՈՀԱՐԸ ԱՄՆ-ում ելույթ է ունեցել 6 տարբեր նահանգներում, իսկ Կանադայում՝ 2 քաղաքներում։
2009 թվականին խումբը հանդես է եկել Դամասկոսում եւ Հալեպում, 2010 թվականին Զուք Միքայիլ, Լիբանան, 2012-ն՝ Ուրուգվայում, Արգենտինայում եւ Պրազիլում։
ԳՈՀԱՐ-ի ամենատպավորիչ ելույթներից մեկը համարվում է 2011 թվականի մայիսի 28-ին Երեւանի Ազատության հրապարակում տեղի ունեցած համերգը` հայ երգիչների մասնակցությամբ, նվիրված Հայաստանի առաջին հանրապետության հռչակման տարեդարձին:
ԳՈՀԱՐ-ն ունի համերգային ելույթների հիման վրա թողարկված ձայնասկավառակներ:
2009 թվականին ՀՀ նախագահ Սերժ Սարգսյանի հրամանագրով, Հայաստանի Հանրապետության անկախության հռչակման 18-րդ տարեդարձի առթիով, մշակույթի և արվեստի բնագավառում ներդրած նշանակալի ավանդի համար լիբանանահայ բարերար Գոհար Խաչատուրեանը պարգեւատրվել է «Մովսես Խորենացի» մեդալով:
