11.09c
Երեվան
չրք, սպտ 09
Թուրքիայի Դիարբեքիր նահանգի Սուր շրջանում գտնվող հայ կաթոլիկ եկեղեցին, տարածքում հայտարարված պարետային ժամի ընթացքում, դարձել է թուրք ոստիկանների հարձակման թիրախ: Այդ մասին, ըստ Akunq.net-ի, հաղորդում է «Դիջլե» լրատվական գործակալությունը:
Աղբյուրի համաձայն` Հասըրլը թաղամասում գտնվող հազարամյա եկեղեցին մեծապես տուժել է: Ոստիկանները, սակայն, չեն բավարարվել միայն եկեղեցու վրա հարձակմամբ. նրանք գողացել են այնտեղ գտնվող որոշ պատմական իրեր:
Միջագետքի հայերի միության նախագահ Արաթ Քարագյոզյանը գործակալությանը հայտնել է, որ հայերը պատրաստվում են այս փաստի առնչությամբ դատական գործ հարուցել: Նա նշել է, թե եկեղեցին կրել է մոտ 300 հազար թուրքական լիրա գումարի չափով վնաս:
Քարագյոզյանը նաև ասել է. «Ոստիկանությունը եկեղեցի է մտել` կոտրելով այստեղի պատմական դռները: Ակնհայտ է, որ մեծ հարձակում է գործվել եկեղեցու վրա: Գողացվել են հախճապակու վրա արված մեր 6 պատմական նկարները, ինչպես նաև` մեր պահեստում գտնվող փորագրված պատմական քարերը»:
Հիշեցնենք, որ ավելի վաղ Սուրի շրջանում ոստիկանների եւ ՊԿԿ-ի անդամների միջև տեղի ունեցած բախումների հետևանքով տուժել էր նաև Սուրբ Կիրակոս հայկական եկեղեցին:
